स्वास्थ्य चौकीलाई ३७ लाखको जग्गा
बैतडी — पाटन ७ भूमेश्वरमा एक महिलाले पतिको सम्झनामा स्वास्थ्य चौकी भवन निर्माणका लागि ३७ लाख बराबरको ६ रोपनी जग्गा दान गरेकी छन् ।
भूमेश्वर पुख्र्यौली घर भई धनगढी उपमहानगरपालिका बस्दै आएकी ६१ वर्षीया विद्यादेवी महराले स्वर्गीय पति सुरेन्द्रको सम्झनामा ३६ लाख ६६ हजार मूल्यको जग्गा दिएकी हुन् । सामाजिक काममा अग्रसर महराको ५३ वर्षको उमेरमा मृत्यु भएको थियो । पतिको सामाजिक कामप्रतिका अधुरा इच्छा पुरा गर्ने र स्वास्थ्य संस्था टाढा भएका कारण गाउँका महिलाले उपचार नपाएर पाउने पीडामा सहयोग पुर्याउने उद्देश्यले जग्गादान गरेको महराले बताइन् । उक्त ठाउँमा स्वास्थ्य चौकी भवन बनेपछि स्थानीय बासिन्दाले सहज रूपमा स्वास्थ्य सेवा पाउने छन् । स्वास्थ्य चौकी भवन बनाउन जग्गा तयारी गर्ने काम सुरु भएको छ । आउँदो वर्षमा भवन निर्माण हुने स्वास्थ्य कार्यालयले जनायो । बिहीबार प्रमुख जिल्ला अधिकारी लीलाधर अधिकारीले जग्गादाताको सम्मान र निर्माणस्थल कटानीको उद्घाटन गरेका छन् । जग्गा कटाउन स्थानीय वीरबहादुर चन्दले आर्थिक सहयोग गरेका छन् ।
प्रकाशित : जेष्ठ ३, २०७३ ०७:१५