६ लाख खर्चेर मनकामनामा सुन्तलाको प्रतिमा
गोरखा — सहिद लखन गाउँपालिका–२ मनकामनास्थित ढाडबारीमा सुन्तलाको प्रतिमा बनाइएको छ । काउली, लसुन, एभोकाडो, आलुलाई पछ्याउँदै गोरखामा कंक्रिटको सुन्तला बनाइएको हो ।
गोरखा उद्योग वाणिज्य संघले भने सुन्तला खेतीका लागि मनकामना प्रसिद्ध रहेको भन्दै सुन्तलाको प्रतिमा बनाएको दाबी गरेको छ । सोमबार गोरखा उद्योग वाणिज्य संघका अध्यक्ष कृष्णकुमार श्रेष्ठ र वडाध्यक्ष सकुन थापाले प्रतिमाको अनावरण गरेका हुन् ।
प्रतिमा निर्माणका लागि ६ लाख खर्च भएको गोरखा उद्योग वाणिज्य संघ मनकामना बजार इकाईका अध्यक्ष हरि श्रेष्ठले बताए । हातको पन्जामा सुन्तलाको आकृति बनाएर ढाडबारी बसपार्कको बीचमा प्रतिमा बनाएको छ ।
‘गुलियो र रसिलो हुने भएकाले मनकामनाको सुन्तला भनेपछि देशभर प्रख्यात छ,’ उनले भने,‘यहाँको सुन्तलाको पहिचान स्थापित तथा प्रचारप्रसारका लागि पनि प्रतिमा निर्माण गरेका हौँ ।’
मनकामना क्षेत्रमा सुन्तला खेतीबाट किसानले सिजनमा ५० हजारदेखि २० लाख रुपैयाँसम्म आम्दानी गर्ने कृषि ज्ञान केन्द्रले जनाएको छ ।
