ढुंगा दोहनले पहिरो

कान्तिपुर संवाददाता

खोटाङ — तुवाचुङ जायजुममुनि बर्खेटार क्षेत्रमा अनियन्त्रित ढुंगा दोहनका कारण निरन्तर पहिरो झर्ने समस्या भएको छ । मध्यपहाडी लोकमार्गअन्तर्गत तुवाचुङ जायजुममुनि बर्खेटार क्षेत्रमा एक्साभेटर प्रयोग गरेर ढुंगा निकाल्ने गरिएको छ ।

मध्यपहाडी लोकमार्गअन्तर्गत खोटाङको तुवाचुङ जायजुम क्षेत्रमा झरेको पहिरो पन्छाउँदै । तस्बिर : डम्बरसिं राई

सडक निर्माण कम्पनीले सूर्य कन्स्ट्रक्सनले एक्साभेटर प्रयोग गरेर ढुङ्गा दोहन गर्दैगर्दा मंगलबार दिउँसो पहिरो झरेको थियो । पहिरोले एक्साभेटर समेत पुरेको प्रहरीले जनाएको छ । पहिरोले सडक अवरुद्ध गरेपछि यात्रु अलपत्र परेका थिए ।


दिक्तेलदेखि काठमाडौं जाँदै गरेका यात्रु, काठमाडौंदेखि दिक्तेल आउँदै गरेका यात्रु अलपत्र परेका थिए । त्यस्तै दिक्तेलदेखि धरान, धरानदेखि दिक्तेल, दिक्तेलदेखि विराटनगर, विराटनगरदेखि दिक्तेल आउँदै गरेका यात्रु अलपत्र परेको खोटाङका प्रहरी नायव उपरीक्षक राजकुमार केसीले बताए ।


सडक बनाउने बहानामा तुवाचुङ–जायजुममुनि एक्साभेटर प्रयोग गरेर ढुङ्गा दोहन गर्दा त्यसको कम्पनले पहिरो खसेको स्थानीयले बताएका छन् । गत भदौ १४ गते र साउन २१ गते पनि पहिरो गएको थियो । पटक–पटक पहिरो गइरहने भएकाले यो क्षेत्रमा यात्रा जोखिम बनेको छ । यसबारेमा तुवाचुङ जायजुम संरक्षण समिति भने बेखबर छ ।


कमिसनको चलखेलका कारण ढुङ्गा दोहनमा तुवाचुङ–जायजुम संरक्षण समितिका पदाधिकारीहरू नै संलग्न देखिएकाले यस्तो अवस्था आएको संरक्षण समितिका एक सदस्यले बताए । कमिसनको चलखेलमा ढुङ्गा दोहन भएको भन्दै चौतर्फी गुनासा आएका छन् । तुवाचुङ–जायजुम संरक्षण समितिका महासचिव दिनेश राईले भने आफूहरूमाथि झूटो आरोप लगाइएको बताउँदै आएका छन् ।

प्रकाशित : भाद्र २९, २०७५ ०९:५२
प्रतिक्रिया
पठाउनुहोस्

आलुमा आत्मनिर्भर

कान्तिपुर संवाददाता

तेह्रथुम — हिउँदे र वर्षे आलु उत्पादनमा तेह्रथुम आत्मनिर्भर हुँदै गएको छ । उत्पादनले स्थानीय उपभोक्ताको माग पूरा गरेर अन्यत्र पनि उल्लेख्य परिमाणमा निकासी हुने गरेको छ ।

कृषि विकास कार्यालयका अनुसार आर्थिक वर्ष ०७४/७५ मा ६८ करोड ५१ लाख बढीको आलु निर्यात भएको छ । कार्यालयका अनुसार चालु आवमा जिल्लामा ३४ हजार २ सय ५५ मेट्रिकटन आलु उत्पादन भएको छ ।

आलु उत्पादनमा पछिल्ला वर्षमा तेह्रथुम आत्मनिर्भर वन्दै गएको वरिष्ठ कृषि विकास अधिकृत रोहिणीराज घिमिरेले बताए । अघिल्ला वर्षहरूमा हिउँदका केही महिना पूर्वी तराई, भारत र भुटानका आलु भित्रने गरेकामा अब स्थानीय उत्पादन नै प्रशस्त्र भएको उनले बताए ।

कृषि अनुसन्धान केन्द्र पाख्रीवासले तेह्रथुम सहित कोसी पहाडका जिल्लाका किसानलाई आलु खेतीमा सघाउने गरेको छ । गुणस्तरीय बिउ, रोग अवरोधक जातको सिफारिस, जातीय शुद्धता, भौगोलिक अवस्थाअनुसार जातको छनौटलगायत काममा किसानलाई सहयोग गरिरहेको छ ।

कृषि विकास कार्यलयले पनि आलु खेती गर्ने किसानका खेतबारीमै पुगेर रोग अवरोधक र बढी उत्पादन दिने जातहरू खुमल रातो २, खुमल सेतो १, जनकदेव, आइपीवाई ८ र खुमल लक्ष्मी जातका आलु रोप्न किसानलाई प्रोत्साहित गर्ने गरेको छ । ०७०/७१ मा २ हजार ८ सय ८० हेक्टर क्षेत्रफलमा विभिन्न जातका आलु खेती गरिएकोमा आव ०७४/७५ मा क्षेत्रफल वढेर २ हजार ९ सय हेक्टर पुगेको कार्यालयले जनाएको छ ।

प्रकाशित : भाद्र २९, २०७५ ०९:५१
पूरा पढ्नुहोस्
प्रतिक्रिया
पठाउनुहोस्