सुरु भयो गाईजात्रा

कान्तिपुर संवाददाता

काठमाडौँ — भाद्र कृष्ण प्रतिपदादेखि अष्टमीसम्म आठ दिन मनाइने परम्परागत सांस्कृतिक पर्व गाईजात्रा उपत्यकका विभिन्न स्थानमा मनाइँदैछ । नगर परिक्रमा गर्नाले वर्षभरि मृत्यु भएका व्यक्ति गाईको पुच्छर समाई वैतरणी पार हुन्छन् भन्ने धार्मिक विश्वास छ ।

प्रकाशित : भाद्र ११, २०७५ ११:२१

गाईजात्रामा एक वर्षभित्र दिवङ्गत आफन्तको सम्झनामा गाई वा मानिसलाई गाईका रूपमा सिंगारी आ-आफ्नो इलाकामा परिक्रमा गराइने र उनीहरूलाई श्रद्धालुद्वारा दूध, फलफूल, रोटी, चिउरा, दहीका साथै अन्न र द्रव्य दान गर्ने परम्परा छ ।

राजा प्रताप मल्लले पुत्रशोकले विह्वल आफ्नी रानीलाई दुनियाँले पनि यस्तै शोक बेहोर्नुपर्छ भन्ने देखाउन जनतालाई ‘आ-आफ्नो मरेका व्यक्तिका नाममा गाईजात्रा निकाली सहर परिक्रमा गराउनू’भनी आज्ञा दिएकामा यतिले पनि रानीको मन शान्त हुन नसकेकाले विभिन्न प्रकारका प्रहसन तथा व्यंग्यात्मक कार्यक्रम पनि गराउने आदेश दिएअनुरूप जात्राको प्रचलन चलेको बताइन्छ ।

गाईजात्राकै अवसरमा उपत्यकाका विभिन्न स्थानबाट निकालिने जात्रामा समाजमा विद्यमान विकृति र विसङ्गति उजागर गर्ने मनोरञ्जनात्मक तथा व्यङ्ग्यात्मक प्रस्तुति समते गरिन्छ ।

प्रतिक्रिया
पठाउनुहोस्

वैवाहिक बलात्कारविरुद्ध कानुन

कान्तिपुर संवाददाता

काठमाडौँ — आइतबार प्रकाशित दुर्गा कार्कीको ‘वैवाहिक बलात्कार गुपचुपै’ लेखले मुलुकी अपराध आचारसंहितामा व्यवस्था भएको वैवाहिक बलात्कार विरुद्धको सजायलाई महिला हिंसाविरुद्ध सकारात्मक कदमका रूपमा लिएको छ ।

नेपालमा महिला विरुद्ध हुँदै आएका कैयांै जघन्य अपराधमध्ये वैवाहिक बलात्कार प्रमुख देखिन्छ । दाइजो र पुत्र प्राप्तिका आकाङ्क्षी सासू–ससुरा र पतिले बुहारी एवं पत्नीलाई जिउँदै जलाएका घटनामा पनि कतै न कतै वैवाहिक बलात्कार गाँसिएको पाइएको छ ।


बढ्दो सहरीकरण र भूमण्डलीकरणले नेपाली समाजमा खुलापनका नाममा छाडा यौनवादी संस्कृति मौलाउँदै गएको छ, जसले वैवाहिक बलात्कारलाई प्रबद्र्धन गरिरहेको हुनसक्छ । यस सम्बन्धमा सरकार एवं सरोकारवाला सजग भई कानुन बनाउनु सराहनीय छ । तर वैवाहिक बलात्कारजस्तो संवेदनशील अपराधलाई छानबिन गर्ने भरपर्दाे संयन्त्र चाहिन्छ । पत्नीको उजुरीलाई मात्र आधार बनाइयो भने क्षतिपूर्ति वा आर्थिक लाभका लोभमा विकृति ल्याउने सम्भावना रहन्छ ।
– नारायण निरौला
विराटनगर

प्रकाशित : भाद्र ११, २०७५ १०:३८
पूरा पढ्नुहोस्
प्रतिक्रिया
पठाउनुहोस्