सरकारले लहडमा टिकटक बन्द गर्‍यो, यसरी लोकतन्त्र संस्थागत हुन सक्दैन : प्रमुख सचेतक गिरी

शनिबार काठमाडौंमा भएको सूचना चलखेल र लोकतन्त्र विषयक अन्तरक्रिया कार्यक्रममा प्रमुख सचेतक गिरीले कसैलाई मन नपरेको भरमा सामाजिक सञ्जाल बन्द गर्ने कुराले लोकतन्त्रको संस्थागत हुन नसक्ने जिकिर गरे ।

उनले नियमन र निगरानीको बाटो हुँदाहुँदै सीधा बन्द गर्ने निर्णय लिनुलाई जायज मान्न नसकिने दाबी गरे । उनले सत्तामा हुनेलाई केही कुरा बिजायो भन्दैमा बन्द गरिदिने कुराले समस्याको समाधान नहुने बताए ।

‘चाहे पत्रकार होस् वा नेता, चाहे कर्मचारी हुन् वा जुनसुकै क्षेत्रका मानिस हुन् । प्रत्येक नागरिकले आफूले केही कुरा बोल्छ र लेख्छ भने त्यस कुराप्रति आफैँ जवाफदेही हुनैपर्छ,' उनले भने, 'जवाफदेही नहुनु भनेको लोकतन्त्र हो भन्ने बुझाइ हुनु सही होइन । हामीले आफूले गरेका काम र कर्तव्यप्रति सम्पूर्ण रुपले जवाफदेही बन्नैपर्छ ।'

उनले लोकतान्त्रिक सरकारले जनताले रुचाएको विषयमा नियमन र निगरानीमार्फत् समाधान खोज्नुपर्ने तर प्रतिबन्ध लगाउन नमिल्ने बताए ।