राष्ट्रपति पौडेल अस्पताल भर्ना

वैशाख ५, २०८०कान्तिपुर संवाददाता

काठमाडौँ — राष्ट्रपति रामचन्द्र पौडेललाई शिक्षण अस्पताल महाराजगञ्जमा उपचारका लागि भर्ना गरिएको छ । त्रिवि शिक्षण अस्पतालका प्रशासन प्रमुख वैकुण्ठ थपलियाका अनुसार मंगलबार पुन: भर्ना गरिएको हो ।

एक साताअघि मात्रै छातीमा समस्या देखिएपछि पौडेलको शिक्षण अस्पतालमा उपचार गरिएको थियो ।

सोमबार मात्रै उनी फलोअपका लागि अस्पताल पुगेर घर फर्किएका थिए । तर मंगलबार फेरि छातीमा समस्या देखिएपछि पौडेललाई शिक्षण अस्पतालमा भर्ना गरिएको अस्पतालका प्रशासन प्रमुख थपलियाले जानकारी दिए ।

डा. निरज बमको नेतृत्वमा उनको स्वास्थ्य उपचार भइरहेको छ ।