कर्णालीको सिमी–फापर थन्कियो

-संस्थानले सिमी र फापरको बजारीकरण गर्न सकेन-गोदाममै ९ सय क्विन्टल सिमी र ७ सय क्विन्टल फापर -यो वर्ष ६ सय ५० क्विन्टल खरिद गरिने
जनक नेपाल

नेपालगन्ज — खाद्य संस्थानले कर्णाली क्षेत्रबाट सिमी, फापर र मास खरिद गर्न थाले पनि बजारीकरण नहुँदा सयौं क्विन्टल गोदाममै थन्किएको छ । ढुवानी अनुदानमा कर्णालीमा चामल बिक्री वितरण गर्दै आएको संस्थानले केही वर्षयता त्यहाँका उत्पादन खरिद गर्न थालेको हो । हिमाली भेगको पौष्टिक तथा अर्गानिक सिमी फापरको पर्याप्त प्रचारप्रसार नहुँदा बिकेको छैन । 


खाद्य संस्थानको थापाथलीस्थित गोदाममा ९ सय क्विन्टल सिमी र ७ सय क्विन्टल फापर नबिकेर थन्किएको छ ।

जुम्लाको सिंजामा १ सय १० रुपैयाँ केजी पाइने सिमीको दाल संस्थानले काठमाडौंमा प्रतिकेजी १ सय ५० रुपैयाँमा बिक्री गर्नसमेत सकेको छैन । त्यस्तै ८० रुपैयाँ प्रतिकेजी खरिद गरेको फापर ९० रुपैयाँ केजीमा बिक्री नभएको हो । खुद्रा बिक्रीका लागि आकर्षक प्याकिङ नगरिएकाले पनि आम उपभोक्ताले कर्णालीको सिमी र फापर खरिद गर्न पाएका छैनन् । यस वर्ष भने मूल्य घटाएर भए पनि सिमी र फापर बिक्री गर्ने योजना बनाएको संस्थानले जनाएको छ । संस्थानका महाप्रबन्धक कुमारप्रसाद दाहालले कर्णालीका अर्गानिक उत्पादनको राम्रो प्रचारप्रसार र बजारीकरण गर्न नसक्दा अपेक्षा गरिएजस्तो बिक्री नभएको उनले सुनाए । ‘यसअघि किन्ने योजना बनेछ । बिक्री कसरी गर्ने भन्ने योजना नहुँदा खरिदको अनुपातमा नबिकेको पाइयो,’ उनले भने, ‘अब प्रचारप्रसार गरेर कर्णालीको कोसेलीका रूपमा बिक्री गर्ने योजना बनाउँदै छौं ।’ यो वर्ष खरिदसँगै बिक्रीको योजनासमेत ल्याउन महाप्रबन्धक दाहालले खाद्य संस्थानका शाखाहरूलाई निर्देशन दिएका छन् ।

संस्थानले आफूसँग भएको सिमी फापर बिक्रीसँगै यो वर्ष झन्डै ६ सय ३० क्विन्टल नयाँ खरिद गर्ने भएको छ । हुम्ला, जुम्ला, कालीकोट, मुगुबाट सिमी, फापर र मासको दाल खरिद गर्दै छ । त्यस्तै दैलेखबाट भटमास खरिद गर्दै छ । संस्थानले कालीकोटबाट एक सय क्विन्टल सिमी र ३० क्विन्टल फापर खरिद गर्ने योजना बनाएको छ । त्यस्तै हुम्लाबाट ५० क्विन्टल सिमी, मुगुबाट एक सय क्विन्टल सिमी, ३० क्विन्टल फापर र मास खरिद गर्न लागेको छ । जुम्लाबाट सय क्विन्टल सिमी र ३० क्विन्टल फापर तथा दैलेखबाट १ सय ४० क्विन्टल भटमास खरिद गर्न लागिएको संस्थानले जनाएको छ ।
हुम्लामा भने सिमी खरिद महँगो पर्ने भएकाले अन्योल भएको वरिष्ठ अधिकृत नारायणसिंह केसीले बताए । त्यहाँ सिमी प्रतिकेजी २ सय रुपैयाँ पर्छ । ‘कोटाअनुसार सिमी खरिद गर्नै मुस्किल छ । त्यसैले चामलसँग साट्ने प्रस्ताव गरेको छु,’ उनले भने । दुई केजी चामल बराबर एक केजी सिमी खरिद गर्न सकिने केसीले बताए । संस्थानको हुम्ला शाखाले गत वर्ष १ सय ६० रुपैयाँ केजीको दरले १६ क्विन्टल सिमी खरिद गरेको थियो ।

मुगु र कालीकोटमा भने सिमी, फापर र मास खरिदमा कुनै समस्या छैन । कालीकोटमा खरिद हुने अधिकांश सिमी जुम्ला सिंजा क्षेत्रको हो । त्यहाँ प्रतिकेजी १ सय २५ रुपैयाँमा सिमी खरिद गर्न लागिएको छ । ‘खरिद गर्न कुनै समस्या छैन । गुणस्तर विभागका प्राविधिकले गुणस्तर जाँच गरेपछि मात्र खरिद सुरु गर्नेछौं,’ संस्थान शाखा प्रमुख अनिलकुमार श्रेष्ठले भने, ‘बोरा पनि आइसकेको छैन ।’
मुगुमा प्रतिकेजी १ सय ४० रुपैयाँका दरमा सिमी र ८० रुपैयाँमा फापर खरिद भइरहेको छ । त्यस्तै १ सय ४५ रुपैयाँ प्रतिकेजीका दरले मास खरिद भइरहेको छ । कोटाअनुसारको मास, सिमी र फापर खरिद गर्न कुनै समस्या नभएको शाखा प्रमुख भरतराज खनियाँले बताए । उनले भने, ‘खरिद सुरु भइसकेको छ । राम्रो प्रचारप्रसार गर्न सके कर्णालीका गेडागुडी र फापरले राम्रो बजार लिन सक्छन् ।’

प्रकाशित : माघ ७, २०७४ ०७:५४
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

जाजरकोट–डोल्पा सडक अन्तिम चरणमा

दसैंमा सदरमुकाम र पाँच वर्षभित्र तिब्बती नाका तिन्जे र क्याटोसम्म ट्रयाक खोल्ने जनतासँग प्रतिबद्धता जनाएर हामीले चुनाव जितेका छौं : प्रदेशसभा सदस्य 
जनक नेपाल

नेपालगन्ज — डोल्पालीको भाग्य र भविष्यसँग जोडिएको जाजरकोट–दुनै सडक निर्माण कार्य अन्तिम चरणमा पुगेको छ । डोल्पा सिमाना खदाङदेखि त्रिपुराकोटबीचको चार किलोमिटर भीर खण्ड मात्र ट्रयाक खोल्न बाँकी छ । 

चालु आर्थिक वर्षभित्रै ट्रयाक खोल्ने लक्ष्य लिइएको नेपाली सेनाको सडक निर्माण कार्यदलले जनाएको छ । ‘अब ४२ सय मिटर ट्रयाक खोल्नुपर्ने छ । यो कडा चट्टाने भीर खण्ड हो,’ कार्यदल प्रमुख विश्वबन्धु पहाडीले भने, ‘कुनै व्यवधान नआए असार मसान्तभित्र ट्रयाक खोलिसक्ने लक्ष्य लिएका छौं ।’

उक्त खण्डमा सिउडिनी, कालो जाब्ला, बेरुझारे, तपतपे, फुलपाने, यरीपतन, धाउन्ने र चुगाड भीर रहेको समयभित्रै ट्रयाक खोल्न चुनौती भने रहेको महासेनानी पहाडीले बताए ।
उत्तरी सीमा जोड्ने भेरी करिडोरअन्तर्गतको जाजरकोट–दुनै सडक खण्ड ट्रयाक खुलेपछि पनि सहज मोटर चल्ने अवस्था भने छैन । उक्त खण्डमा ६ वटा ठूला पुल निर्माण गर्नुपर्नेमा रिम्ना पुल मात्र बनिसकेको छ । ट्रयाक खुलेपछि नलसिंहगाड, भेरी नदीमा चिसापानी, तल्लुबगर र रुपाने–त्रिपुराकोट पुल निर्माणका लागि सडक विभागले बोलपत्र आह्वान गर्नेछ ।

छिन्चु–जाजरकोट सडक निर्माण पूरा भएसँगै सरकारले ०६४ सालमा सेनालाई दुनै सडक निर्माणको जिम्मा दिएको थियो । जाजरकोट पासागाडबाट दुनैसम्मको १ सय १८ किलोमिटर ट्रयाक खोल्न सुरु गरिएकै आठ वर्ष पुगिसकेको छ । सुरुमै उक्त सडक जाजरकोट हुँदै लैजाने कि रुकुमबाट भन्ने विवाद र राजनीतिक तानातानले दुई वर्ष काम अवरुद्ध भएको थियो । दुवै जिल्ला हुँदै भेरी नदीको वारिपारि गर्दै लैजाने सहमतिपछि आर्थिक वर्ष ०६६/०६७ देखि मात्र सडक निर्माण प्रारम्भ गरिएको थियो । उक्त सडकमा हालसम्म झन्डै ८० करोड रुपैयाँ खर्च भइसकेको छ ।

बर्सेनि बजेट भाषणमा दुई वर्षभित्र निर्माण पूरा गर्ने प्रतिबद्धता गर्ने तर पर्याप्त बजेट नछुटयाउने समस्याले पनि सडक निर्माण ढिलो भएको डोल्पा (ख) प्रदेशसभा सदस्य वीरबहादुर शाहीले बताए । पछिल्ला वर्षमा बजेट अभाव नभएपछि सडक निर्माणमा सेनाको कार्यदलले तीव्रता दिएको हो ।

‘सुरुमै जाजरकोट र रुकुमको विवादले दुई वर्ष रोकियो । त्यसपछि केही वर्ष पर्याप्त बजेट आएन,’ उनले भने, ‘हाल बल्ल सडक निर्माणले गति लिएको छ । अब बिनाअवरोध ट्रयाक खुल्ने आशा जागेको छ ।’ सेनाको सडक निर्माण कार्यदलले असार मसान्तभित्र निर्माण पूरा गर्ने बताइहेका बेला शाही भने दसैंसम्म मोटर पुगे खुसी हुने बताउँछन् ।

जाजरकोट–दुनै सडकमा झन्डै ४७ किलोमिटर जाजरकोट खण्ड छ । त्यस्तै त्रिवेणीबाट ३० किलोमिटर रुकुम खण्ड छ भने खदाङदेखि ४१ किलोमिटर डोल्पा खण्ड पर्छ । त्यसमध्ये पासागाड, मन्माई–राडीज्युला, तल्लुबगर, त्रिवेणी बजारसम्म सवारी साधन चल्न थालेका छन् । खदाङसम्म पनि ट्रयाक्टर चल्ने गरेको छ ।

विश्व बैंकको सहयोगमा छिन्चु–जाजरकोट सडक स्तरोन्नति तथा कालोपत्रे भइरहेको छ । उक्त खण्डलाई जाजरकोट–पासागाड हुँदै भेरी करिडोरसम्मै विस्तार गर्न सहजताका लागि ७८ किलोमिटर खण्ड सडक विभागलाई गत वर्षै हस्तान्तरणसमेत गरिएको नेपाली सेनाले जनाएको छ । प्रधानसेनापति राजेन्द्र क्षेत्रीले गत वर्ष साउन २७ मा डोल्पा प्रवेश उद्घाटनलगत्तै सडक हस्तान्तरण गरी स्तरोन्नति तथा कालोपत्रे र पुल निर्माणका लागि बाटो खुलेको महासेनानी पहाडी बताउँछन् ।

सदरमुकाम दुनै राष्ट्रिय सडक सञ्जालले जोडिएपछि भेरी करिडोरको काम उत्तरी सीमातर्फ अघि बढ्नेउनले बताए ।

प्रकाशित : माघ ५, २०७४ ०७:५८
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×