इसीडी शिक्षा सुधार गर्ने शिक्षामन्त्री श्रेष्ठको प्रतिबद्धता
![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/mastercreativegif900x100-0952024115624.gif)
काठमाडौँ — शिक्षामन्त्री सुमना श्रेष्ठले प्रारम्भिक शिक्षा तथा बालविकास (इसीडी) शिक्षा सुधार गर्ने प्रतिबद्धता जनाएकी छन् ।
![](https://assets-cdn.ekantipur.com/uploads/source/ads/900x100-0762024075620.gif)
![इसीडी शिक्षा सुधार गर्ने शिक्षामन्त्री श्रेष्ठको प्रतिबद्धता](https://assets-cdn-api.ekantipur.com/thumb.php?src=https://assets-cdn.ekantipur.com/uploads/source/news/kantipur/2024/third-party/sumana-shrestha-0952024020104-1000x0.jpg&w=1001&h=0)
![](https://assets-cdn.ekantipur.com/uploads/source/ads/sathi-deposit-900-100-1262024124333.gif)
शिक्षामन्त्रीको लिखित प्रतिबद्धता पछि ११ देखि माइतीघर मण्डलामा उभिएर धर्ना दिँदै आएका समाजवादी विद्यार्थी युनियनका अध्यक्ष नेत्र चापागाईंले आइतबारदेखि दबाव तथा विरोधका कार्यक्रम स्थगित गरेका छन् ।
चापागाईं इसीडी शिक्षा सुधारको माग राख्दै जेठ २ गते देखि दैनिक ८ घण्टाका माइतीघरमा उभिँदै आएका थिए । शिक्षामन्त्री श्रेष्ठले चापागाईंले उठाएका मागहरु सम्बोधन गर्न प्राथमिकता दिने घोषणा गरेकी छन् ।
बालबालिकाले पाउने दिवा खाजाको रकम वृद्धि गर्न पहल गर्ने उनको प्रतिबद्धता छ । ‘विद्यार्थीलाई दैनिक खाजा खर्च १५ रुपैयाँ पर्याप्त नरहेकोमा हामी सहमत छौँ । तर नेपालको आर्थिक अवस्थाका कारण अनिवार्य दायित्व समेत पूरा गर्न सम्झौता गर्नु पर्ने अवस्थामा एकै शीर्षकमा तीन गुना भन्दा बृद्धि हुने थप व्ययभार एकैपटक थप्न सम्भव नहुने देखियो । यसकारण सर्वप्रथम कुपोषणले ग्रसित बनाएका कर्णाली प्रदेशमा भने कम्तिमा २०–२५ सम्म प्रति विद्यार्थी लक्षित दिवा खाजाको कार्यक्रमका लागि पहल सुरू गरिसकेका छौँ,’ उनले सामाजिक सञ्जालमा लेखेकी छन् ।
दिवा खाजाकै लागि मेघा किचन तथा स्थानीय अनाजहरूको प्रयोग जस्ता कार्यक्रमलाई बजेटमार्फत लागू गराएर कम खर्चमै पनि ताजा, पोषिलो र गुणस्तरीय खाजा खुवाउने तथा अन्य स्रोतहरूको खोजी गर्न मन्त्रालयले नीति तथा कार्यक्रम र बजेटमा योजना प्रस्ताव गरेको उनको भनाइ छ । आउँदो आर्थिक वर्षबाटै केही स्थानमा पाइलट प्रोजेक्टको रुपमा उक्त कार्यक्रम लागु हुने जनाइएको छ ।
इसीडी शिक्षकलाई योगदानमा आधारित सामाजिक सुरक्षा प्रणालीको दायरामा ल्याइने शिक्षामन्त्री श्रेष्ठले बताएकी छन् । चापागाईंले न्युनतम पारिश्रमिकमा काम गरिरहेका इसीडी शिक्षकको पारिश्रमिक वृद्धि गर्नुपर्ने माग गरेका थिए ।
‘इसीडी शिक्षकको न्युनतम पारिश्रमिकको सुनिश्चितताका लागि अन्तरसरकारी पहल गरिनेछ । यसले सबै अस्थायी, करार शिक्षकलाई मात्र होइन, हाम्रा इसीडी शिक्षक समेत समेट्नेछ । साथै, अब आउने बजेट वक्तव्य र बजेटमा इसीडी शिक्षकलाई केन्द्रीत गहन प्रशिक्षण सम्बन्धी नयाँ कार्यक्रम समेत प्रस्ताव गरेका छौँ,’ उनले लेखेकी छन् ।
इसीडी शिक्षामा एकरुपता ल्याउन मन्त्रालयले अध्ययन गरिरहेको उनको भनाइ छ । निजीमा ३ वर्षे र सरकारी विद्यालयमा एकवर्षे पूर्वप्राथमिक शिक्षाको कार्यक्रम सञ्चालन हुँदै आएको छ । त्यसमा एकरुपता ल्याउनुपर्ने चापागाईंले औंल्याएका थिए ।
अध्ययनबाट आउने सुझावका आधारमा इसीडीलाई संस्थागत र सार्वजनिक दुवैतिर समान वर्षको बनाउने व्यवस्था गरिने उनले घोषणा गरेकी छन् । शिक्षामन्त्री श्रेष्ठले आन्दोलन गरेर इसीडी शिक्षा सुधारको बहसमा मुलधारमा ल्याएको भन्दै अभियन्ता चापागाईंलाई धन्यवाद समेत दिएकी छिन् ।
प्रकाशित : जेष्ठ १३, २०८१ २०:२३