आजकै दिन : अमेरिकाद्वारा इराकमा ‘स्मार्ट बम’ प्रहार

खाडी युद्धका क्रममा ‘अपरेसन डेजर्ट स्ट्रोम’ अन्तर्गत अमेरिकी सेनाले ती बम प्रहार गरेको थियो । १९९० को दशकमा इराक र अमेरिका नेतृत्वका ४२ देशहरूबीच खाडी युद्ध चलेको थियो । त्यसक्रममा अमेरिकाको नेतृत्वमा इराकविरुद्ध दुई चरणमा आक्रमण गरिएको थियो ।

पहिलो चरणको ‘अपरेसन डेजर्ट सिल्ड’ १९९० को अगस्टदेखि १९९१ को जनवरीसम्म चलेको थियो । १९९१ को जनवरी १७ देखि चलेको दोस्रो चरणको ‘अपरेसन डेजर्ट स्ट्रोम’ कुवेत मुक्त भएसँगै १९९१ को फेब्रुअरी २८ मा अन्त्य भएको थियो । इराकी राष्ट्रपति सद्दाम हुसेनले १९९० को अगस्ट २ मा कुवेतमा आक्रमण गरेका थिए । त्यसको दुई दिनमै इराकले कुवेतमाथि नियन्त्रण कायम गरेको थियो । जसका कारण साउदी अरब र इजिप्टले अमेरिका र पश्चिमी देशलाई हस्तक्षेपका लागि आग्रह गरेका थिए ।

तनावबीच राष्ट्रसंघीय सुरक्षा परिषद्ले कुवेतबाट सेना फिर्ता गर्न गरेका आग्रह इराकले अस्वीकार गरेपछि अमेरिकाले आक्रमण सुरु गरेको थियो । कुवेतमाथि आक्रमण गर्नेमध्ये अधिकांश सैनिकले आत्मसमर्पण गरेका थिए भने केही मारिएका वा भागेर इराक फर्केका थिए । युद्धका कारण कम्तीमा एक लाख सर्वसाधारणले ज्यान गुमाएका थिए ।