अन्तरकलेज प्याट्रियट्स कप क्रिकेट शनिबारदेखि
काठमाडौँ — ललितपुर प्याट्रियट्सको आयोजनामा प्याट्रियट्स कप दोस्रो अन्तरकलेज टी– २० क्रिकेट प्रतियोगिता शनिबारदेखि हुने भएको छ । प्रतियोगितामा १२ छात्र टिमको सहभागिता रहने मंगलबार पत्रकार सम्मेलनमा जानकारी गराएको छ । सहभागीलाई ४ समूहमा विभाजन गरी लिगकम नकआउट आधारमा खेलाइने छ ।
समूह ‘ए’ मा ब्लु बर्ड, ब्रिलियन्ट र टेक्सस तथा समूह ‘बी’ मा पिनाकल, गोल्डेनगेट र प्राइम कलेज रहेका छन् । त्यस्तै समूह ‘सी’ मा काठमाडौं मोडल कलेज, काठमाडौं युनिभर्सिटी र केएफए तथा ओरियन्ट, हेटौंडा स्कुल अफ म्यानेजमेन्ट र पब्लिक युथ कलेज समूह ‘डी’ मा छन् ।
विजेताले १ लाख र उपविजेताले ५० हजार रुपैयाँ पुरस्कार प्राप्त गर्नेछन् । प्लेयर अफ द टुर्नामेन्टले २५ हजार रुपैयाँ जित्नेछन् । उत्कृष्ट ब्याटर र बलरले १५–१५ हजार पुरस्कार जित्नेछन् । कुल १५ खेल हुनेछ । प्रत्येक खेलको म्यान अफ द म्याचले २ हजार ५ सय पुरस्कार पाउने प्रतियोगिता निर्देशक सारोन जोशीले बताइन् ।
उनले युवा खेलाडीलाई अवसर र प्रतिभावन खेलाडीको पहिचान गर्नु प्रतियोगिताको मुख्य उद्देश्य भएको बताइन् । निर्देशकले प्रतियोगिताबाट २ उत्कृष्ट खेलाडी छनोट गरी विशेष सहयोग गर्ने प्रतिबद्धता जनाइन् ।
आयोजक प्याट्रियट्सका अध्यक्ष किशोर महर्जनले प्रतियोगिताको ट्रफी सार्वजनिक गरेका थिए । आयोजकका अनुसार प्रतियोगिताका लागि ५० लाख रुपैयाँ खर्च हुनेछ । आठदिने प्रतियोगिताका खेल मूलपानी क्रिकेट मैदानमा हुनेछ । पहिलो संस्करण ब्लु बर्डले जितेको थियो ।