डढेलोमा जलेर घाइते भएकी बालिकाको मृत्यु

शुक्रबार घरमुनिको वनमा बुबासँग बाख्रा चराउन गएकी बालिका बुबा नन्दाराम चौलागाईसँगै आगोले पोलिएर घाइते भएकी थिइन् । घाइते बालिकालाई मान्म हुँदै जुम्लाबाट शनिबार बेलुकी हेलिकोप्टरमा सुर्खेत लगिए पनि उपचारका क्रममा आइतबार बेलुकी मृत्यु भएको आफन्त रविन्द्र चौलागाईले बताए ।

बालिकाको शव कर्णाली प्रदेश अस्पताल सुर्खेतमा पोष्टमार्टम गरेर सोमबार दिउँसो गिरीघाटमा दाहसंस्कार गरिएको हो । 'बहिनीको त ज्यान गइसक्यो,' नजिकका आफन्त रविन्द्र चाैलागाईले भने, 'कान्छो बुबाको अवस्था भने सुधारोन्मुख छ ।' घाइते नन्दरामको भने उपचार भइरहेको छ । वनमा बाख्रा चराउन गएको बेला एक्कासी तलबाट आएको आगोले दुवै बाबुछोरी पोलिएर घाइते भएका थिए ।

वनमा चराउन लिएका उनीहरुका ४५ वटा बाख्रा सबै मरेका छन् भने घरमा रहेका २ दिनका ६ वटा पाठा पनि दुध खान नपाएर मरेको छिमेकी हिरामणि चौलागाई बताए । आगोले पोलिएर घाइते भएका नन्दाराम चौलागाईको उपचारको लागि कालीकोटका स्थानीय ब्यवसायी तथा आफन्त हिरामणि चौलागाईको पहलमा नन्दाराम बचाउ अभियान संचालन गरिएको छ ।

शनिबारदेखि सोमबारसम्म फेसबुक र मान्म बजारबाट १ लाख ७० हजार १ सय ४० रुपैयाँ नगद संकलन भएको छ ।