पर्वत — त्रिभुवन विश्वविद्यालय अन्तर्गत पर्वतको गुप्तेश्वर बहुमुखी क्याम्पसमा भएको स्ववियु निर्वाचनमा नेपाल विद्यार्थी संघ र अनेरास्ववियु क्रान्तिकारीको संयुक्त प्यानल विजयी भएको छ ।
क्याम्पसमा २१२ मतदाता रहेकोमा १८५ मत खसेको थियो । जसमध्ये नेविसंघका तर्फबाट अध्यक्षका उम्मेदवार सतिश रेग्मीले १३१ मत ल्याए । उनका निकटतम प्रतिस्पर्धी अनेरास्ववियुकी जोश्ना कुँवरले ५३ मत ल्याइन् । मुख्य निर्वाचन अधिकृत ओमकार गिरीका अनुसार एक मत बदर भएको छ ।
अन्य पदाधिकारीतर्फ पनि नेविसंघ र अखिल क्रान्तिकारीका उम्मेदवारहरु नै विजयी भएका छन् । सचिवमा नेविसंघका लक्ष्मण रेग्मी ११४ मत ल्याएर विजयी भए । कोषाध्यक्षमा अखिल क्रान्तिकारीकी पवित्रा नेपालीले ११९ मत ल्याएर विजयी भइन् ।
सदस्यहरुमा नेविसंघकी पुजाकुमारी पोख्रेल, अखिल क्रान्तिकारीकी मनिषा परियार र अखिल क्रान्तिकारीकै सबिना क्षेत्री विजयी भएका छन् । समानुपातिकतर्फ संयुक्त प्यानलले १२९ र अनेरास्ववियुले ५५ मत ल्याएको निर्वाचन अधिकृत रमेश शर्माले बताए । बिहान साढे ७ बजेदेखि सुरु भएको निर्वाचन दिउँसो १ बजे सकिएको थियो । मतपरिणाम भने साँझ करिब साढे ५ बजे सार्वजनिक भएको हो ।
पर्वतमा त्रिभुवन विश्वविद्यालयबाट सम्बन्धनप्राप्त १२ क्याम्पसहरु रहे पनि गुप्तेश्वर बाहेक अन्य क्याम्पसहरुमा स्ववियु निर्वाचन हुन सकेन । कुश्माकै शिवालय बहुमुखी क्यापस, ठूलीपोखरी बहुमुखी क्याम्पस, फलेवासको पर्वत, शंकरपोखरी, अन्नपूर्ण, महाशिलाको महाशिला बहुमुखी क्याम्पस लगायत जिल्लाभरका अन्य कुनै पनि क्याम्पसमा तयारी नपुगेको भन्दै स्ववियु निर्वाचन हुन सकेन ।
प्रकाशित : चैत्र ५, २०७९ १९:००
