भन्सार छली ल्याइएका जुत्ता चप्पल बरामद
पर्सा — प्रहरीले भारतबाट भन्सार छली ल्याएको जुत्ता वीरगन्जबाट बरामद गरेको छ । वीरगन्ज महानगरपालिका–८ घण्टाघर सडक खण्डमा घर कोठा भाडामा लिई नामथर वतन नखुलेको व्यक्तिले भारतबाट भन्सार छली चोरी पैठारी गरी ल्याएको ठूलो परिमाणमा जुत्ता बरामद भएको हो ।
भारतबाट ल्याइएको जुत्ताहरू अनाधिकृतरूपमा भण्डारण गरी राखेकोमा गोप्य सूचनाको आधारमा जिल्ला प्रहरी कार्यालयबाट खटिएको प्रहरी टोलीले उक्त जुत्ताका गोदाममा छापा मारेर बेवारिशे अवस्थामा जुत्ताहरू बरामद गरेको छ ।
गोदामबाट ६ सय ९५ जोर जुत्ता, ३७ पिस सुपर क्लिक क्रिम, प्लाष्टिकको लेडिज चप्पल २६ पिस समेत बरामद भएको छ । बरामद जुत्ता, चप्पल लगायतका बस्तुको मूल्य करिब ७ लाख ५ हजार रुपैयाँ रहेको छ । ती सामग्री वीरगन्ज भन्सार कार्यालयमा बुझाइएको जिल्ला प्रहरी कार्यालय पर्साका प्रवक्ता डिएसपि ध्रुव कुमार श्रेष्ठले जानकारी दिए ।
प्रकाशित : फाल्गुन २७, २०८० १९:१७