‘मंसिरभित्र मन्त्रिमण्डल पूर्ण’

प्रदेशसभाको हिउँदे अधिवेशनअघि मन्त्रिमण्डल विस्तार हुने सम्भावना
केन्द्र सरकारले तोकेका ७ मन्त्रालयबाट ११ बनाइने तयारी 
लीलाबल्लभ घिमिरे

विराटनगर — प्रदेश १ को मन्त्रिमण्डलले मंसिरभित्र पूर्णता पाउने भएको छ । विस्तारका लागि मुख्यमन्त्रीले पार्टीभित्र छलफल चलाएसँगै नेकपाका सांसदहरू मन्त्री बन्न लबिइङमा लागिरहेका छन् ।

अस्थायी राजधानी तोकिएको विराटनगरस्थित प्रदेश १ को प्रदेशसभा भवन ।फाइल तस्बिर : कान्तिपुर

प्रदेशसभाको हिउँदै अधिवेशनअघि मन्त्रिमण्डल विस्तार हुने सम्भावना छ । हिउँदे अधिवेशन पुस पहिलो साताभित्र बोलाउने तयारी छ । सरकार बनेको एक वर्ष पुग्न लाग्दासमेत मन्त्रिमण्डलले पूर्णता पाउन सकेको छैन ।

गत वर्ष फागुन ३ मा शेरधन राईको मुख्यमन्त्रीमा नियुक्तिसँगै ५ सदस्यीय मन्त्रिमण्डल गठन भएको थियो । केन्द्रीय सरकारले प्रदेश १ मा ७ वटा मन्त्रालय तोकेको थियो । प्रदेशमा ७ वटा मन्त्रालय स्थापना भएका छन् । ५ वटामा मन्त्री छन् भने २ मन्त्रालय सचिवको भरमा चलिरहेका छन् ।

‘मन्त्रिमण्डलले पूर्णता पाउन ढिलाइ भएकै हो,’ मुख्यमन्त्री राईले भने, ‘तर बिग्रने गरी ढिला भने भएको हैन । यो महिनाभित्र मन्त्रिमण्डले पूर्णता पाउँछ ।’ भौतिक पूर्वाधार विकास मन्त्रालय र भूमि व्यवस्था, कृषि तथा सहकारी मन्त्रालय अहिलेसम्म मन्त्रीविहीन छन् ।

पहिलो मन्त्रिमण्डलमा आन्तरिक मामिला तथा कानुन मन्त्रीमा हिक्मतकुमार कार्की, आर्थिक मामिला तथा योजना मन्त्रीमा इन्द्रबहादुर आङबो, उद्योग, पर्यटन तथा वातावरण मन्त्रीमा जगदीश कुसियत र सामाजिक विकास मन्त्रीमा जीवन घिमिरे नियुक्त भएका थिए ।

यो मन्त्रिमण्डलमा तत्कालीन माओवादीवाट आङबो मात्र परेका थिए । ७ वटा मन्त्रालय हुँदा २ र ११ वटा भए चार मन्त्रालय पाउनुपर्ने माग माओवादीको थियो । अहिले पाटी एकीकरण भए पनि ४ मन्त्री आफूहरूका नेताले पाउनुपर्ने उनीहरूको पुरानो अडानयथावत् छ ।

केन्द्रीय सरकारमा संघीय समाजवादी फोरम नेपाल समेत सामेल भएका कारण प्रदेशमा फोरमलाई ल्याउने कुरा चलेको थियो । तर पछिल्लो समय फोरमलाई प्रदेश सरकारमा नल्याउने सोचमा नेकपाका नेताहरू छन् । प्रदेशमा नेकपाको दुई तिहाइ छ । फोरमका तीन जना सदस्य प्रदेश सभामा छन् । फोरमलाई सरकारमा ल्याउने न ल्याउने भन्नेबारे कुरा नभएको मुख्यमन्त्री राईले बताए ।

मन्त्रालयको संख्या समेत बढाइने भएको छ । केन्द्र सरकारले तोकेका ७ मन्त्रालयबाट ११ बनाइने तयारी भएको छ । एउटै मन्त्रालयमा ५ वटासम्म मन्त्रालय गाभिएको भन्दै ११ वटा मन्त्रालय बनाउने गृहकार्य थालिएको हो ।

‘मन्त्रालयको संख्या धेरै कम भयो,’ सरकारका प्रवक्ता आन्तरिक मामिला तथा कानुन मन्त्री हिक्मत कुमार कार्कीले भने, ‘९ देखि ११ वटा मन्त्रालय बन्न सक्ने अवस्था छ ।’ प्रदेश १ मा ९३ जना प्रदेशसभा सदस्य छन् । संविधानमा सदस्य संख्याको २० प्रतिशत मन्त्री बन्न पाउने व्यवस्था छ ।

प्रकाशित : मंसिर १७, २०७५ ०९:४१
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

तीनजुरे क्षेत्रमा पर्यटकको चाप

२८ प्रजातिका गुराँस फुल्ने तीनजुरेको जंगलमा चिसो मौसम सुरु भएसँगै ‘क्याम्प फायर’ मा आउने पर्यटक बढे
घना जंगलबीचको खुला चौरमा रात बिताउँदा न्यानो र प्राकृतिक आनन्द
चन्द्र कार्की

तेह्रथुम — गुराँस क्षेत्र तीनजुरेको जंगलमा घुम्न आउने आन्तरिक पर्यटकको संख्या बढेको छ । एकै स्थानमा २८ प्रजातिका गुराँस फुल्ने तीनजुरेको जंगलमा चिसो मौसम सुरु भएसँगै ‘क्याम्प फायर’ मा आउनेको संख्या बढेको हो ।

तेह्रथुमको पर्यटकीय क्षेत्र तीनजुरे पहाड फेदीको जंगलमा आन्तरिक पर्यटक ।तस्बिर : चन्द्र/कान्तिपुर

शान्त र मनमोहक रहेको तीनजुरेदेखि चौकीसम्मको जंगल क्षेत्रमा पूर्वी तराई र भारतका विभिन्न स्थानबाट आउनेको संख्या बढेको पर्यटन विकास तथा प्रवद्र्धन समितिका सदस्य प्रकाश श्रेष्ठले बताए ।

यो क्षेत्रमा दैनिक १० भन्दा बढी समूह आइरहेको श्रेष्ठले बताए । यहाँको जंगली क्षेत्रमा आएर पाल टाँगेर रात बिताउने र जंगलमै खानपान गरेर रमाउनेको संख्या बढिरहेको स्थानीय छिरिङ लामाले बताए । धरान, विराटनगर, दमक र इटहरीदेखि समूहमा आउने गरेको उनले बताए ।

खसी, कुखुरा, हाँस, भेडा लगायतका जनावर जंगलमै लगेर काट्ने र आगोमा सेकाएर खाने, नाचगान सहितको सांस्कृतिक कार्यक्रममा रमाउने र केही दिन र रात जंगलमै बास बस्ने चलन पछिल्लो समय बढेको छ । यो ‘क्याम्प फायर’ मा आउने युवाको संख्या बढेको छ ।

घना जंगल बीचको खुला चौरमा रात बिताउँदा न्यानो पनि हुने र प्राकृतिक आनन्द पनि प्राप्त हुने भएकाले धेरैको रोजाइ तीनजुरे क्षेत्रको जंगल परेको गायक समेत रहेका धराने युवा किशोर थुलुङले बताए ।
उनी वर्षमा एक पटक साथीहरूका साथमा क्याम्प फायरका लागि तीनजुरेको जंगलमा उक्लिने गर्छन् ।

‘यहाँको शान्त वातावरणमा क्याम्प फायरमा रमाउनुको मजा नै बेग्लै हुन्छ,’ उनले भने । सहरको भीडभाड र कोलाहलबाट निस्किएर प्राकृतिक सौन्दर्यमा रमाउँदै दिन र रात जंगलमा बिताउँदा छुट्टै आनन्द आउने यहाँ आउनेहरूको अनुभव छ । क्याम्प फायरमा आउनेहरूले खसी, बोका, कुखुरा, भेडाको थुमा, हांसजस्ता जनावर किनने भएकाले स्थानीय पशुपालक किसानलाई पनि राम्रै फाइदा पुगेको छ ।

जंगलभित्र क्याम्प फायरमा रमाउनेहरूले खानेकुरादेखि मदिरा समेत खरिद गर्ने भएकाले आसपासमा रहेका साना पसलहरू समेत राम्ररी चलेको घुर्मिसेमा पसल गरी वसेका युवराज खड्काले बताए ।
पर्यटकीय क्षेत्र तीनजुरेको आरआर गार्डेन, डुँडपानी, घुर्मिसे, पाँचपोखरी, फेदी, चौकी, मंगलवार, कालापनी र आसपासका घना जंगलभित्रका केही खाली चौर क्याम्प फायरका लागि उपयुक्त स्थान मानिन्छन् ।

यो क्षेत्रमा बाहै्र महिना पर्यटक आकर्षित गरी क्याम्प फायर सञ्चालन गर्न भौतिक पूर्वाधार निर्माणको काम समेत भइरहेको छ । यो क्षेत्रमा वर्षभरी नै पर्यटक भित्र्याउन तीनजुरे पहाड फेदीको जंगलमा जंगली जनावरका आकृति समेत कुदिएका छन् ।

बसन्तपुरवासीले यस क्षेत्रलाई पूर्वकै प्रमुख पर्यटकीय गन्तव्य बनाउने उद्देश्यले जंगल भित्र रहेका ठूला ढुंगा र रूखलाई कुँदेर जंगली जनावरको आकृति दिएका हुन् ।

तीनजुरे केही तल रहेको कैलास हिलको फेदीमा बाघ, गोही, छेपारो, कछुवा, डल्फिन, मयूर, जंगली घोडा, बंदेल, मृग लगायतका जंगली जनावरका आकृति कँुदिएका छन् । जंगलमा रहेका ठूला ढुंगामा हिमाली भेगमा पाइने चौंरी, याक र पहाड तराईमा पाइने सांडे गोरुको आकृति कुँदिएको छ ।

जंगलभित्र समुद्रमा पाइने गोही, डल्फिन र कछुवाको आकृति समेत कुँदिएको छ । यो सम्पूर्ण कामका लागि पर्यटन मन्त्रालय र नयाँ सहर आयोजनाले सहयोग गरेका छन् । प्राकृतिक पार्कको शैलीमा निर्माण गरिएका भौतिक पूर्वाधारका कारण बसन्तपुरदेखि तीनजुरे हुँदै चौकीसम्मको यो क्षेत्र पूर्वाञ्चलकै आकर्षक गन्तव्य हुने प्रदेश नम्बर १ का पर्यटन मन्त्री जगदिश कुशियतले बताए ।

जंगलभित्र भीमसेनले छेलो हानेको ढुंगा, सीताले जाँतो पिधेको, ढुंगामा सीताले सारी सुकाएको, बाघ, भालु, मृग लगायतका जंगली जनावरका पाइला लगायतका आकृति देखिन्छ । पात पतिङगर र झ्याउले छोपिएका यी आकृतिलाई सफा गरेर रंग लगाउने काम सम्पन्न भएको छ ।

जंगलभित्र निर्माण भइरहेका आकृति अवलोकनका लागि चारैतर्फ ढुंगाको सोलिङ गरेर पैदल बाटो बनाइएको छ । पर्यटन मन्त्रालयको सहयोगमा यो क्षेत्रलाई अहिले काँडेतारले घेराबारा गरिएको पार्क निर्माण अनुगमन समितिका संयोजक वीरबहादुर सुव्बाले बताए ।

प्रकाशित : मंसिर १७, २०७५ ०९:४०
पूरा पढ्नुहोस्
प्रतिक्रिया
पठाउनुहोस्
ADVERTISEMENT
×