'नेपालीलाई नक्कली भुटानी शरणार्थी बनाउने जति ठूला नेता भए पनि कारबाही हुनैपर्छ'

प्रतिनिधिसभाको सोमबारको बैठकमा सांसदहरूले नेपालीलाई नक्कली भुटानी शरणार्थी बनाएर अमेरिका लैजाने गिरोहमा नाम ठूला नेताहरूको जोडिएकाले छानबिन र कारबाही नहुने हो कि भन्ने आशंका पनि व्यक्त गरेका छन् ।

'लज्जास्पद कुरा भएको छ कि नेपालीलाई भुटानी शरणार्थी बनाइदिने । नेपालीलाई भुटानी शरणार्थी बनाएर लाखौं, करोडौं रुपैयाँ असुलउपर गर्ने ? हजारौं जनतासँग रकम उठाइएको कुरा आएका छन् । यसमा ठूलै नेताहरूको पनि नाम जोडेर सञ्चारमाध्यममा आइपुग्या छ,' उनको आशंका थियो, 'ठूलोलाई चैन, सानोलाई ऐन हुन्छ कि ? नत्र होइन भने यस घटनामा जति ठूलै नेताको नाम जोडिए तापनि गृह प्रशासन काँप्न हुँदैन । गृह प्रशासनले दह्रोसँग खुट्टा टेकेर यसमा संलग्न जति ठूलो नेता भए पनि कारबाहीको दायरमा ल्याउनैपर्छ । कानुनको कठघरामा उभ्याउनैपर्छ ।'

नक्कली शरणार्थी प्रकरण : मुद्दा कमजोर बनाउने खेलमा प्रहरी

नेमकिपाका सांसद प्रेम सुवालले मन्त्री भइसकेका नेताहरूका छोरा नै नेपालीलाई नक्कली भुटानी शरणार्थी बनाउने गिरोहमा संलग्न भएको भन्दै राज्यका निकायले छानबिन गर्नुपर्ने बताए । 'मन्त्री भइसकेकाका छोराहरूको संलग्नतामा ८७५ जना नेपालीलाई भुटानी शरणार्थी बनाएर पठाउने भनी करोडौं रुपैयाँ ठगी गरियो । अख्तियार के गर्दैछ ?,' उनको प्रश्न थियो ।

मुलुकको व्यवस्था यस्ता शासकहरूका कारण कमजोर हुने सांसद सुवालको भनाइ थियो । उनले प्रजातन्त्र शासक दलका प्रतिनिधिहरूलाई स्वार्थ समूहरूको कब्जामा राख्नका लागि नभएको बताए ।

राप्रपाका सांसद धवलशमशेर जबराले नेपाली नागरिकलाई नक्कली भुटानी शरणार्थी बनाएर अमेरिका लैजाने काण्ड बनाएको बताए । सांसद जबराले ठूला मन्त्रीका छोराहरू ती घटनामा संलग्न रहेको भन्दै कानुनी कठघरामा उभ्याउन माग गरेका छन् ।

भुटानी शरणार्थी बनाएर अमेरिका लैजाने भन्दै ८७५ नेपालीसँग १० देखि ५० लाखसम्म उठाउने गिरोहसँग राजनीतिक नेतृत्वको साँठगाँठ रहेको खुलेको थियो । त्यसमा तत्कालीन गृहमन्त्री रामबहादुर थापाका सुरक्षा सल्लाहकार इन्द्रजित राईसमेत रहेको गिरोहलाई हाल एमाले सचिव रहेका टोपबहादुर रायमाझीले सहयोग गरेको पुष्टि भएको थियो । गिरोहका सदस्यले रायमाझीका छोराका नाममा काटेको डेढ करोडको चेक पनि प्रहरीले बरामद गरेको थियो ।

सम्बन्धित समाचार

• अमेरिका उडाउने भन्दै ८७५ नेपालीलाई भुटानी बनाउने गिरोहमा ‘राजनीतिक संलग्नता’
• भुटानी शरणार्थी सूचीका ४२९ जना पनि सन्देहमा
• नक्कली शरणार्थी बनाउने गिरोहमाथिको अनुसन्धान रोकिन्न : गृहसचिव
  
• नेपालीलाई भुटानी शरणार्थी बनाएर अमेरिका उडाउने गिरोहका अर्का नाइके राई समातिए
• अमेरिका लैजान शरणार्थी बनाइए ८७५ नेपाली
• नक्कली शरणार्थी बनाएर अमेरिका लैजान खोज्ने गिरोहका नाइके दुलालसहित ३ पक्राउ
• भुटानी शरणार्थी बनाएर अमेरिका लाने भन्दै करोडौं असुली
• नेपालीलाई 'भुटानी शरणार्थी' बनाउने खेल