चिडियाखानाको पाटेबाघको वार्षिक आहारको जिम्मा ललितपुर महानगरले लियो
काठमाडौँ — ललितपुर महानगरपालिकाले राष्ट्रिय प्रकृति संरक्षण कोष सदर चिडियाखाना जावलाखेलमा रहेको एउटा पाटेबाघको आहार व्यवस्थापनको जिम्मेवारी लिएको छ ।
आइतबार महानगर र सदर चिडियाखाना जावलाखेलबीच समझदारी पत्रमा हस्ताक्षर गरी महानगर प्रमुख चिरीबाबु महर्जनले पाटेबाघको आहार व्यवस्थापनका लागि १५ लाख रुपैयाँको चेक हस्तान्तरण गरेका हुन् ।
महानगरले सदर चिडियाखानामा रहेको ‘महाराजा’ नामक पाटेबाघको वर्ष दिनको आहार व्यवस्थापन (एडप्ट एन्ड एनिमल) का लागि उक्त रकम सहयोग गरेको महर्जनले बताए । २ सय केजी तौल भएको उक्त पाटेबाघको दैनिक आहार ६ केजी मासु व्यवस्थापन गर्नुपर्ने चिडियाखानाका कर्मचारीले बताएका छन् ।
सदर चिडियाखानामा ५ वटा पाटेबाघ रहेका छन् । यसअघि महानगरले कोभिड–१९ संक्रमण अवधिमा वन्यजन्तु तथा पन्छीको आहार व्यवस्थापनका लागि १० लाख रुपैयाँ सहयोग गरेको जनाएको छ । सदर चिडियाखानामा करिब एक हजारवटा जनावर तथा पन्छी छन् । उक्त जनावर तथा पन्छीको आहारका लागि वार्षिक करिब ४ करोड रुपैयाँ खर्च लाग्ने चिडियाखानाका कर्मचारीले बताएका छन् । चिडियाखानाको मुख्य आम्दानीको स्रोत आगन्तुकबाट उठ्ने शुल्क नै हो ।
प्रकाशित : चैत्र ५, २०७९ २२:२७
