लमजुङ — लमजुङ सदरमुकाम बेंसीसहरमा रहेको मर्स्याङ्दी बहुमुखी क्याम्पसको स्वतन्त्र विद्यार्थी युनियन (स्ववियु) मा कांग्रेसको नेविसंघ र माओवादी केन्द्रको अनेरास्ववियु क्रान्तिकारीको संयुक्त प्यानलै निर्वाचित भएको छ ।

आइतबार रातिको मतपरिणाम अनुसार नेविसंघका सुगम देउजा ३ सय २० मत ल्याएर स्ववियु सभापतिमा निर्वाचित भएका छन् । उनका प्रतिद्वन्द्वी एमालेको अनेरास्ववियुका निश्चल पाण्डेले २ सय ११ मत ल्याएर पराजित भएका छन् । सचिवमा नेविसंघका पूर्णबहादुर गुरुङले ३ सय मत ल्याएर निर्वाचित भएका छन् । अनेरास्ववियुका सुष्मा गुरुङले २ सय २४ मत ल्याएर पराजित बनेकी छन् । कोषाध्यक्षमा नेविसंघका शर्मिला भण्डारीले २ सय ८९ मत ल्याएर निर्वाचित हुँदा अनेरास्ववियुका मदनकुमार विकले २ सय ३६ मत ल्याएर पराजित भएका छन् ।

सदस्यमा प्रत्यक्षतर्फ नेविसंघका अनिता थापा, करुणा वाग्ले, पितम विक, शरण पौडेल र सुनिल भट्ट साथै अनेरास्ववियु क्रान्तिकारीका सविना प्रजा चेपाङ निर्वाचित भएका छन् । समानुपातिकतर्फ नेविसंघका वसन्तराज कुइँकेल (प्रकाश), जमुना श्रेष्ठ र पुष्पा तामाङ साथै अनेरास्ववियु क्रान्तिकारीबाट जुना तामाङ सदस्यमा निर्वाचित भएका छन् ।