चित्रमा बुद्ध र स्तूप

केही छिनमै तयार भयो शान्ति स्तूप, बुद्ध, प्रकृति र मान्छेका चित्र । तिनै चित्र पोखराको पीएसएम आर्ट ग्यालरीमा प्रदर्शनीमा राखिएका छन् । महेन्द्रपुलको आर्ट ग्यालरीमा पाका र युवा कलाकारका चित्र बुधबारसम्म प्रदर्शनीमा हुनेछन् । ललितकला प्रज्ञा प्रतिष्ठानको चित्रकला विभागले विश्वशान्ति स्तूपमा माघ १० मा प्रदेश नम्बर ४ स्तरीय कला कार्यशाला गरेको हो । कार्यशालामा ३५ कलाकारले कोरेका चित्र प्रदर्शनीसँगै बिक्रीमा पनि छन् । एक्रेलिक माध्यमा बनाइएका अधिकांश चित्रमा स्तूप र बुद्धलाई प्रस्तुत गरिएको छ । स्थानीय संस्कृति, भेषभूषा, तत्कालीन मौसमलाई दृश्यचित्र र सेमी एब्स्ट्रयाक्ट रूपमा क्यानभासमा कोरिएको छ ।

प्रदर्शनीको अवलोकन गर्न विद्यार्थीको भीड लाग्ने गरेको छ । ग्यालरी पुगेका विद्यार्थी सितोष राना मगरले प्रदर्शनीमा प्रवेश गरेपछि निकै आनन्द लागेको बताए । उनले आफूले पनि कलाको अभ्यास गरिरहेकोले रंग संयोजन, फ्रेमिङका विषयमा ज्ञान पाएको उल्लेख गरे । अर्की विद्यार्थी कुसुम सिंखडाले चित्रले दिन खोजेको सन्देश राम्रो लागेको बताइन् । विद्यालयमा चित्रकला सिकिरहेकी उनी पेन्सिल स्केच गर्न मन पराउँछिन् । चित्रकला प्रतियोगितामा दोस्रो भएर उनले प्याराग्लाइडिङ गर्ने अवसरसमेत पाएकी थिइन् । प्रदर्शनीका चित्र देखेपछि भने आफूले धेरै मिहिनेत गर्न बाँकी रहेको अनुभूति भएको उनले सुनाइन् ।

कलाकार बुद्धि गुरुङले तत्स्थानमा सिर्जना गरिएका कलाले कलाकारको अभिव्यक्तिलाई प्रस्फुटन गर्ने बताए । उनी भन्छन्, ‘धेरै कलाकार एकै स्थानमा भेला भएर चित्र कोर्दा एउटाको शैली अर्कोलाई बुझ्न पनि मद्दत पुग्छ ।’ कलाकार एवं शिक्षक मनोज तामाङले बौद्ध स्तूपमा कोरिएका चित्रले समकालीन चित्रकलालाई प्रस्तुत गर्न खोजेको बताए । युवा कलाकार हेमकान्ति गुरुङले स्तूपसँगै साकुराको बोट बनाइन् । जापानी सहयोगमा बनेको स्तूपलाई प्रतिविम्बित गर्न उनको क्यानभासमा जापानको फूल साकुरा अटाएको उनले बताइन् ।

दुर्गा बराल ‘वात्स्यायन’, रमेश श्रेष्ठ, यादवचन्द्र भुर्तेल, आलोक गुरुङ, एलपी गुरुङ, बुद्धि गुरुङ, थमन सुनार, मनोज तामाङ, महेन्द्रराज भण्डारी, गणेश जीसी, गणेश श्रेष्ठ, आकाश गुरुङ, देवेन्द्र गुरुङ, गोपाल श्रेष्ठ, गोपाल दरै, किरण रञ्जित, किरण गुरुङ, ज्योति गुरुङ, हेमकान्ति गुरुङ, एलिता गुरुङ, प्रमिश गुरुङ, पदम घले, निशान थापा, समस थापा, युवराज लामिछाने, सन्दीप न्यौपाने, विश्व केसी, विश्वराज पराजुली, हरेराम जोजिजु, सुदीप श्रेष्ठ, ढाका भट्टराई, ज्योत्सना श्रेष्ठ र केशर गुरुङका कलाकृति प्रदर्शनीमा छन् । प्रतिष्ठानले पोखराका पुराना कलाकार ललित शाहीलाई सम्मानसमेत गरेको छ ।