एउटै वस्तुबाट जोगिँदा दीर्घायु
काठमाडौँ — हालैको एउटा अध्ययनको दाबीअनुसार, यदि तपाईं लामो जीवन पाउन चाहनुहुन्छ भने, खानपानमा कार्बोहाइड्रेटको मात्रालाई सीमित गर्नुस् ।
खानामा आवश्यकताभन्दा कम वा बढी कार्बोहाइड्रेट लिनेहरू अल्पायु मृत्युको जोखिममा हुने गर्छन् ।
४५–६४ वर्ष उमेर समूहका १५ हजार ४ सय २८ व्यक्तिमा गरिएको यो अध्ययन ‘ल्यान्सेट’ मा प्रकाशित छ । सहभागीहरूमध्ये पुरुषले दिनहुँ ६००–४२०० किलो क्यालोरी ऊर्जा ग्रहण गर्थे भने महिलाले ५००–३६०० किलो क्यालोरी ।
अनुसन्धानअनुसार, कार्बोहाइड्रेटमा ४० प्रतिशतभन्दा कम वा ७० प्रतिशतभन्दा बढी ऊर्जा ग्रहण गर्नाले मृत्युको जोखिम बढछ । तर कार्बोहाइड्रेटका रूपमा ५०–५५ प्रतिशत ऊर्जा लिनेहरूको छिटो मृत्यु हुने सम्भावना कम हुन्छ ।
अनुसन्धानको आकलन अनुसार, सीमित मात्रामा कार्बोहाइड्रेट खानेहरूको आयु आवश्यकताभन्दा कम कार्बोहाइड्रेट खाने व्यक्तिको तुलनामा चार वर्ष बढी पाइयो ।
प्रकाशित : भाद्र १६, २०७५ ०८:१५
