एक्स–रे मेसिन बिग्रेपछि अन्तर्राष्ट्रिय विमानस्थल भन्सारबाट निर्यात ठप्प
काठमाडौं — एक्स–रे मेसिन बिग्रेको डेढ महिना बित्दा पनि मर्मत नगरेपछि अन्तर्राष्ट्रिय विमानस्थल भन्सार कार्यालयबाट तेस्रो मुलुकमा हुने नेपाली बस्तुको निर्यात व्यापार आजदेखि ठप्प भएको छ । सम्झौताअनुसार एक्स–रे मेसिन मर्मत नेपाल पारवहन तथा गोदाम व्यवस्थापन कम्पनी लिमिटेडले गर्नुपर्छ ।
बिग्रेको लामो समय बित्दा पनि भन्सार हातामा जडान गरिएको उक्त मेसिन मर्मत नगर्दा समस्या भएको नेपाल फ्रेड फरवार्डस एसोसिएसनका वरिष्ठ उपाध्यक्ष राजेन्द्र संग्रौलाले जानकारी दिए ।
स्रोतका अनुसार मेसिन मर्मतका लागि आवश्यक सामाग्री अहिलेको बजार मुल्य अनुसार करिब २७ लाख पर्छ । नागरिक उड्ययन प्राधिकरण र गोदाम व्यवस्थापन कम्पनीबीचको सम्झौताअनुसार विमानस्थलमा सामान गोदाम गरेवापत बार्षिक करिब ३३ देखि ३४ करोड संकलन गर्दै आएको छ ।
स्रोतका अनुसार गत आर्थिक वर्षमा कम्पनी नाफामा थियो । नाफाको रकम नागरिक उड्डयन र कम्पनीले बाँड्ने गरेका छन् । सम्झौता अनुसार मेसिन मर्मतको जिम्मेवारी गोदाम व्यवस्थापन कम्पनीको हो । गोदाम कम्पनी पूर्ण सरकारी स्वामित्वको कम्पनी हो । कार्गो व्यवसायीसमेत रहेका वरिष्ठ उपाध्यक्ष संग्रौलाले अन्तर्राष्ट्रिय उडान हुने विमानस्थलमा एउटा एक्स–रे मेसिनसमेत नभएको सन्देश जानु मुलुककै लागि अशोभनीय भएको बताए । उनले एक्स–रेको कारण निर्यात गरिएका सामानमा कैफियत देखिएमा जिम्मेवार व्यवसायी नै हुने भएकाले पनि आफूहरु मर्कामा परेको बताए ।
गोदामको एक्स–रे मर्मत गर्न दबाब दिने उद्देश्यले व्यवसायीकोसमेत समर्थनमा मजदुर युनियनले सोमबार कामै नगरी निर्यात ठप्प बनाएका हुन् । भरपर्दो मेसिनले एक्स–रे नगरिएका बस्तु अन्तर्राष्ट्रिय उडानले नबोक्ने नीति छ । दुई मध्ये एउटा मेसिन सञ्चालन हुँदा एकै दिन हुने काम दुई दिन लाग्ने र निर्यात सामाग्रीको ओसार–पसारमासमेत असहज हुने गुनासो कार्गो व्यवसायी र मजदुरले गर्दै आएका छन् ।
निर्यात सहज नभएपछि विमानस्थलको गोदाममा ५० टन भन्दा बढी सामान थुप्रिएको छ । निर्यातकर्ताले पारवहनलाई प्रति केजी ७ रुपैयाँ तिर्ने गरेका छन् । नेपालबाट मुख्यतः कार्पेट, गार्मेन्ट, हेयाण्डी क्राफ्टलगायतका बस्तु निर्यात हुने गरेको छ ।
‘जति अनुरोध गरेपनि मेसिन मर्मत नगरेपछि हामी बाध्य भएर निर्यात ठप्प बनाउने अवस्थामा पुगेका हौं,’ बाग्मती प्रदेश ट्रेड युनियन कांग्रेसका वरिष्ठ उपाध्यक्ष खेम सुवेदीले भने । मेसिन नहुँदा गोदाममा काम गर्ने मजदुरहरुले भौतिक रुपमा निकै असुविधा भोगेको भन्दै सुवेदीले एउटा मेसिनले सामान स्क्यान गरेरै नभ्याउने बताए । उक्त मेसिन पनि बिग्रेर भन्सारको एक्स–रेबाट झिकेर मर्मत गरिएको छ । उक्त मर्मतका लागि भन्सारबाट सापटी ल्याएर मर्मत गरिएको थियो । अब त्यो मेसिन पनि बिग्रियो भने के गर्ने त्यसको व्यवस्थापनसमेत नभएको भन्सार अधिकरीहरु बताउँछन् ।