गीतमा झल्कियो सुगमको राष्ट्रप्रेम
काठमाडौँ — गायक सुगम पोखरेलको स्वरमा नयाँ गीत ‘किन हुँदैन’ सार्वजनिक भएको छ । साहस शाक्यको संगीत रहेको गीत गायनमा सुगमलाई गायिका संगीता प्रधानले साथ दिएकी छन् । गीतको शब्द चन्द्र प्रसाईं ‘परिष्कृत’ ले कोरेका हुन् ।
राष्ट्रिय भावनाले भरिएको गीतले स्वदेश वा विदेश जहाँ रहेर भए पनि नेपालको हितमा काम गर्न सकिन्छ भन्ने हो । गीतमा नेपाललाई माया गर्न र गर्यो भने देशमै सबै सम्भव भएको भावना व्यक्त गरिएको छ । देश सफल र सबल बनाउन एकता आवश्यक पर्ने गीतको सन्देश छ ।
गीतको आलाप आरसी रिमालले गाएका छन् भने कोरसमा साहस शाक्य, आरसी रिमाल र सौगात खनालले साथ दिएका छन् । गीतको भिडियोमा गायक पोखरेलसँगै, ल्याङ्दी दादा, सीता सुवेदीको मुख्य अभिनय छ । सुरेन्द्र बसेलको निर्देशन रहेको भिडियोको छायांकन दिनेश पराजुली र सम्पादन नवीन निरौलाले गरेका हुन् । भिडियोको प्रोडक्सन हेड सरोज पोखरेल हुन् भने निर्माता तेजी प्रसाईं रहेकी छन् ।
गीतकार प्रसाईंकै च्यानल प्रसाईं सन इन्टरटेनमेन्ट युट्वुबबाट सार्वजनिक गीतमा देशका कलासंस्कृतिसमेत समेटिएका छन् । एक दशक अगाडिदेखि गीत लेखन गर्दै आएका गीतकार परिष्कृतका शब्दमा थुप्रै गीत बजारमा आइसकेका छन् ।
प्रकाशित : माघ २३, २०७९ ०९:४५
