काठमाडौँ — इक्वेडर र पेरुमा शक्तिशाली भूकम्प जाँदा १४ जनाको मृत्यु भएको छ । भूकम्पका कारण कतिपय घर र भौतिक संरचना भत्किएका छन् । प्रभावित क्षेत्रका मानिसहरू सुरक्षित स्थानका लागि घरबाट बाहिर निस्किएका छन् ।

अमेरिकी भूगर्भ सर्वेक्षण अनुसार इक्वेडरको तटीय क्षेत्र गुयासमा ६.७ म्याग्निच्यूडको भूकम्प गएको हो । अधिकारीहरूका अनुसार भूकम्पपछि सुनामीको आकलन भने गरिएको छैन ।

भूकम्पबाट इक्वेडरमा १३ जना र छिमेकी पेरुमा एक जनाको मृत्यु भएको अन्तर्राष्ट्रिय मिडियाले जनाएका छन् । साथै इक्वेडरका अधिकारीहरूले त्यहाँ १ सय २६ जना मानिस घाइते भएको बताएका छन् ।

इक्वेडरका राष्ट्रपति ग्वेल्लेर्मो लास्सोले उद्धारका लागि मातहतका अधिकारीहरूलाई आदेश दिएका छन् । छिमेकी पेरुमा भने इक्वेडरसँगको उत्तरी सीमा क्षेत्रमा भूकम्पको बढी धक्का महसुस गरिएको थियो । पेरुका प्रधानमन्त्री अल्बेर्तो ओतारोवाले भूकम्पका कारण पेरुमा ४ वर्षीया बालिकाको मृत्यु भएको बताएका छन् ।