‘मैले २ करोड सानु भण्डारीलाई बुझाएँ'

गिरोह सञ्चालनमा रहेका दोस्रो तहका मतियारमध्येका चौधरीले २ दर्जनभन्दा बढी मानिसबाट उठाएको २ करोड रुपैयाँ गिरोहका नाइके सानु भण्डारीलाई बुझाएको भिडियोमा उनले खुलाएका छन् । पीडित स्रोतबाट प्राप्त भिडियोमा चौधरीले सुरुमा नक्कली शरणार्थीको आवेदन भराएर परिचय पत्र लिँदै प्रक्रिया अघि बढ्ने र अमेरिका छिट्टै उडाइने भनेर भण्डारीले भनेको आधारमा पैसा उठाइएको खुलाएका छन् । पीडितहरूले केही महिनाअघि काठमाडौंमा चौधरीलाई समातेर सोधपुछ गरेका थिए । त्यही क्रममा भिडियो पनि लिएका थिए ।

पीडितको यही समूहले सचिव टेकनारायण पाण्डे गृह मन्त्रालयमा रहेका बेला आफ्नो गुनासो मन्त्रालयमा दर्ता गर्न खोज्दा पाण्डेले ‘मैले भण्डारीको टिमलाई चिनेको छु, तिमीहरूको पैसा फिर्ता गराउँला । निवेदन दर्ता गर्नुपर्दैन‚’ भनेर फिर्ता पठाएको बताएका छन् । चौधरीले पीडित १७ जनाको समूहबाट १ करोड १२ लाख रुपैयाँ र बाँकीबाट गरेर जम्मा २ करोड रुपैयाँ भण्डारीलाई बुझाएको बताएका छन् ।

भण्डारीले यो समूहलाई भने अमेरिकासँगको ‘गभरमेन्ट टु गभरमेन्ट’ प्रक्रियामा अमेरिका पठाइने भनेर चौधरीलाई माध्यम बनाएर पैसा उठाउन लगाएका थिए । पीडितले यही निवेदन उपत्यका अपराध अनुसन्धान कार्यालयमा दर्ता गरेको आधारमा चौधरी पक्राउ गरिएको हो ।