त्रिकोणात्मक ट्वान्टी २० सिरिज : हङकङलाई हराएपछि यूएई बलियो
काठमाडौँ — यूएई त्रिकोणात्मक ट्वान्टी २० सिरिजमा आइतबार हङकङलाई ६ विकेटले पराजित गर्दै फाइनल प्रवेशका लागि बलियो प्रत्यासी बनेको छ । सिरिजमा यूएईको यो पहिलो जित हो । यो जितसँगै यूएईको दुई खेलबाट दुई अंक भएको छ ।
हङकङ अहिलेसम्म जितविहीन रहेको छ । तीन खेल खेलिसकेको हङकङ अंकविहीन छ । आयोजक नेपाल भने यसअघि नै लगातार तीन खेल जितेर ६ अंकका साथ फाइनल पुगिसकेको छ ।
काठमाडौंको मूलपानी क्रिकेट मैदानमा आइतबार भएको खेलमा जितका लागि १ सय ५० रनको लक्ष्य पाएको यूएईले ४ विकेट गुमाएर १८ ओभरमा १ सय ५३ रन बनायो । उसका लागि ओपनर तथा कप्तान मोहम्मद वासिमले सर्वाधिक ४० रन बनाए । वासिमले यसका लागि १७ बलको मात्र उपयोग गरे र चार चौका तथा तीन छक्का प्रहार गरे । त्यस्तै अर्का ओपनर खालि साहले ३७ रन जोडे ।
बलिङतर्फ हङकङका यसिन मुर्तजाले २ विकेट लिएका थिए । निजाकत खान र एसशान खानले समान १-१ विकेट लिएका थिए ।
पहिले ब्याटिङ गरेको हङकङले पाँच विकेटको गुमाएर १ सय ४९ रन बनाएको थियो ।
उसका लागि बाबर हयातले ४५ बलमा ६६ रन बनाएका थिए । उनले तीन चौका तथा पाँच छक्का प्रहार गरे । अजिज खानले नटआउट रहेर ४३ बलमा ४८ रन बनाएका थिए ।
बलिङतर्फ यूएईका जहुर खानले ३ विकेट लिएका थिए भने निलानस केशवानीले २ विकेट लिएका थिए ।
प्रकाशित : कार्तिक ५, २०८० १४:३६