धरान — पूर्वाधारमा देखिएका कमी कमजोरी आठौं संस्करणमा नदोहोरिने प्रतिबद्धता जाहेर गर्दै शुक्रबार उपराष्ट्रपति नन्दबहादुर पुनको आतिथ्यमा सातौं राष्ट्रिय खेलकुद सकिएको छ ।
समापनकै अवसरमा आठौं राष्ट्रिय खेलकुद मध्यपश्चिमाञ्चलमा आयोजना गरिने घोषणा गरिएको छ । एन्फा टेक्निकल सेन्टरमा सम्पन्न समारोहमा खेलकुद मन्त्री दलजित श्रीपाइलीले मध्यपश्चिमाञ्चल टोलीलाई राष्ट्रिय खेलकुदको झन्डा हस्तान्तरण गरे ।
समारोहमा उपराष्ट्रपति पुनले सातौं राष्ट्रियमा बेहोर्नुपरेको पूर्वाधारको समस्या, व्यवस्थापन र खेलाडी अनुशासनका विषयमा आफू जानकार रहेको उल्लेख गर्दै पूर्वाधारका समस्याले खेल र खेलाडीलाई प्रभावित गर्ने बताए । पुनले यस्ता समस्याकै कारण राष्ट्रिय खेलकुदको बाह्रौं संस्करण हुनुपर्ने अवस्थामा सातौंमा बल्ल पुग्नु दु:खद भएको स्मरण गराए ।
नेपाली खेलकुद विकासका लागि राष्ट्रिय प्रतियोगिता नियमित हुनु जरुरी भएको औंल्याउँदै उपराष्ट्रपति पुनले भने, ‘सातौं खेलकुदमा कतिपय राष्ट्रिय नयाँ कीर्तिमान कायम छन्, यसबाट खेलकुदको विकास मापन गर्न सकिन्छ ।’
खेल अनुशासन र व्यवस्थापनका कुरा मिडियामा आउनु राम्रो नभएको उल्लेख गर्दै उनले भने, ‘अनुशासित फौजले मात्र युद्ध जित्न सक्छ, त्यस्तै अनुशासित खेलाडीले मात्र खेल जित्न सक्छ ।’ उनले राष्ट्रिय खेलकुदका लागि पूर्वाधार निर्माण महत्त्वपूर्ण भएकाले आठौं राष्ट्रियको पूर्वाधार तयारीमा जुट्न खेलकुद मन्त्रालय तथा राष्ट्रिय खेलकुद परिषद्को ध्यानाकर्षण गराए ।
धरानस्थित मुख्य रंगशालाको मैदान तयारी गर्न नसक्दा कुनै खेलकुद हुन नसके पनि समापन समारोह त्यही रंगशालामा गरिने पूर्वघोषणा गरिएको थियो । तर रंगशालाको मैदान सम्याउने काम हुन नसक्दा समारोह धरान–१७ स्थित एन्फा टेक्निकल सेन्टरमा आयोजना गरिएको हो ।
धरानमा आयोजक राष्ट्रिय खेलकुद परिषद् स्वामित्वका ३ वटा पूर्वाधार भए पनि यहाँ भएका ७ मध्ये ६ वटा राष्ट्रिय प्रतिस्पर्धा स्थानीय सामुदायिक पूर्वाधारमा गर्नुपरेको थियो । धरान–१३ स्थित अमर सेवा कभर्डहल, डिपो उच्च माविको बास्केटबल कोर्ट र बीपी कोइराला स्वास्थ्य विज्ञान प्रतिष्ठानको अन्तर्राष्ट्रिय गल्फ कोर्समा प्रतिस्पर्धा सञ्चालन भए । खेलकुद मन्त्री श्रीपाइलीले सातौं राष्ट्रिय खेलकुदमा देखिएको पूर्वाधार तयारी अभावलाई गम्भीर रूपमा लिएको बताए । उनले अब पूर्वाधार निर्माणलाई खेलकुद विकासको पहिलो सर्तका रूपमा लिइने प्रतिबद्धता जनाए । उनले भने,
‘अबका पूर्वाधार निर्माणका काम योजनाबद्ध अघि बढाउँछौं ।’
आठौं राष्ट्रिय खेलकुदमा पूर्वाधारको समस्या नआउने उनको दाबी थियो ।
सातौं राष्ट्रिय तीन वर्षअघि नै हुनुपर्ने भए पनि स्थगन हुँदै ५ वर्षपछि आयोजना गरिएको हो । हरेक २ वर्षमा हुने गरी २०३८ सालमा काठमाडौंबाट सुरु राष्ट्रिय खेलकुद ३५ वर्षपछि पहिलोपटक पूर्वाञ्चलमा आयोजना भएको हो । राष्ट्रिय खेलकुद परिषद्का सदस्य सचिव केशवकुमार विष्टले प्रतियोगिता सफलतापूर्ण आयोजना भएको दाबी गरे ।
विभिन्न कारणले समयमा राष्ट्रिय खेलकुद आयोजना नहुँदा नेपाली खेलकुद निराशाजनक अवस्थामा गुज्रिरहेका बेला सातौं खेलकुद आयोजना गर्न राखेप सफल रहेको उनको भनाइ थियो ।
समापनको अवसरमा एपीएफ र त्रिभुवन आर्मीबीच पुरुष फुटबलको फाइनल भएको थियो । प्रधानसेनापति राजेन्द्र क्षेत्री एवं सशस्त्र प्रहरीका महानिरीक्षक दुर्जकुमार राई समारोहमा उपस्थित थिए । साताव्यापी सातौं रष्ट्रिय खेलकुदका विभिन्न ३५ खेलमा २ सय ९४ स्वर्णका लागि प्रतिस्पर्धा भएको थियो । प्रतिस्पर्धामा ३ हजार ९ सय ७२ खेलाडीले भाग लिएको आयोजक राखेपले जनाएको छ । सातौं राष्ट्रियमा क्षेत्रीय छनोटमार्फत ४ हजार ३ सय १० र प्रत्यक्ष सहभागितातर्फ १ हजार ५ सय ३९ गरी ५ हजार ८ सय ४९ खेलाडीले भाग लिएका थिए ।
प्रतियोगिताका खेल सुनसरीको धरान, दुहबी, इटहरी, इनरुवा, झापाको चन्द्रगढी, धुलाबारी, दमक, काँकडभिट्टा, सप्तरीको राजविराज, सिरहा सदरमुकाम, मोरङको विराटनगर, बैजनाथपुर, टंकीसिनवारी, धनकुटा, पोखरा, काठमाडांै र ललितपुरमा भएका थिए । सातौं राष्ट्रियमा स्क्वास, साइक्लिङ, आर्चरी र फेन्सिङमा पदक प्रदान गरिएन ।
