काठमाडौंबाट गाउँ फर्किँदै गरेका युवा मृत फेला

आइतबार बिहान खोलामा शव देखिएको खबरपछि जिल्ला प्रहरी कार्यालयबाट प्रहरी निरीक्षक देवीराम भण्डारीको नेतृत्वमा पुगेको ७ जनाको प्रहरी टोलीले लिबाङ–धाङ्सी सडक खण्डमुनिको खोलाको बीच भागमा शव फेला पारेको थियो ।

शव फेला पारेपछि अनुसन्धान गर्दा उक्त शव रोल्पा नगरपालिका–१० धबाङका २९ वर्षीय मणीष पुनको भएको पहरीले जनाएको छ । प्रहरीले ती युवा अघिल्लो दिन काठमाडौंबाट लिबाङसम्म आएको र त्यसपछि घर पुग्ने क्रममा रिपाभिरबाट खसेको हुन सक्ने जनाएको छ ।

घटनाका बारेमा थप अनुसन्धान भइरहेको प्रहरी नायब उपरीक्षक श्याम सारु मगरले बताए । घटनास्थल लिबाङदेखि ३ किलोमिटर उत्तरमा पर्छ ।