बस र मोटरसाइकल ठोक्किँदा एक जनाको मृत्यु
बर्दिया — राजापुरतर्फ गइरहेको बस र गुलरियातर्फ आइरहेको मोटरसाइकल आपसमा ठोक्किँदा बिहीबार एक जनाको मृत्यु भएको छ । भे १ ख २२५४ नम्बरको बस र भे ४ प ५६४७ नम्बरको मोटरसाइकलसँग ठोक्किँदा पछाडि बसेकी ठाकुरबाबा नगरपालिका ९ कि २६ वर्षीया सरिता थारुको मृत्यु भएको बर्दिया जिल्ला ट्राफिक प्रमुख ईश्वरी देवकोटाले जनाए ।
सख्त घाइते भएकी थारुलाई उपचारका लागि अस्पताल लगिएकोमा अस्पतालमै उनको मृत्यु भएको उनले बताए । प्रहरीले बस चालक तेजमान थारु र बसलाई नियन्त्रणमा लिई कारबाही प्रक्रिया अघि बढाएको जनाएको छ ।
उक्त घटना सदरमुकाम गुलरियाबाट करिब १६ किमि पश्चिम मधुवन नगरपालिका ८ नम्बर चोकस्थित हुलाकी सडकमा भएको हो ।
प्रतिक्रिया