त्रिभुवन बहुमुखी क्याम्पस बेलाटारीमा अनेरास्ववियुको प्यानल विजयी
परासी — त्रिभुवन बहुमुखी क्याम्पस बेलाटारी पश्चिम नवलपरासी प्रतापपुरमा अनेरास्ववियुको प्यानल विजयी भएको छ । नेविसंघ र जनमत विद्यार्थी संघको संयुक्त प्यानललाई पराजित गर्दै अनेरास्ववियुका कामेश पासी अध्यक्ष रहेको प्यानल नै विजयी भएको हो ।
४ सय १५ मत खसेकोमा अनेरास्ववियुको पासीले २ सय ३५ र नेविसंघसहित संयुक्त प्यानलका अध्यक्ष उम्मेदवार रिजाउदीन मियाँले १ सय ७८ मत प्राप्त गरेको निर्वाचन अधिकृत रामप्रसाद भट्टराईले बताए । सचिवमा अनेरास्ववियुका मुस्तकिम देवान, कोषाध्यक्षमा समिरकुमार थापा मगर विजय भएका छन् । समानुपातिकमा पनि अनेरास्ववियुको नै बर्चस्व रहेको छ ।
हृदयेश त्रिपाठीको नेतृत्वमा रहेको जनता प्रगतिशील पार्टीले एमालेको अनेरास्ववियुलाई सहयोग गरेपछि नेविसंघ र सिके राउत नेतृत्वको जनमत विद्यार्थी संघले संयुक्त प्यानल बनाएर चुनावी मैदानमा उत्रिएका थिए ।
प्रकाशित : चैत्र ५, २०७९ २१:४२
