सर्लाहीको जनता माविमा आन्दोलित २० विद्यार्थी पक्राउ

विद्यार्थीको प्रदर्शनले उग्र रुप लिएको भन्दै प्रहरीले २० जना विद्यार्थीलाई नियन्त्रणमा लिएको छ ।विद्यालयमा शिक्षक अभावले पढ्न नपाएको भन्दै विद्यार्थीहरुले गाउँपालिका कार्यालयमा तालाबन्दी गर्नुका साथै ढुंगामुढा समेत गरेका थिए ।

आक्रोशित विद्यार्थीहरुले गाउँपालिका अध्यक्ष राजकुमार महतोको घरमा ढुंगामुढासहित घर अगाडि टायर बालेर प्रदर्शन गरेका छन् । विद्यार्थीको प्रदर्शन उग्र बन्न थालेपछि २० जना प्रदर्शनकारीलाई नियन्त्रणमा लिइएको प्रहरी उपरीक्षक नरेशराज सुवेदीले जानकारी दिए ।

अगामी भदौमा परीक्षा संचालन हुने भए पनि अहिलेसम्म शिक्षक अभावका कारण पढ्न नपाएको विद्यार्थीहरुको गुनासो छ । उनीहरुले आइतबार पनि शिक्षकको माग गर्दै कार्यालय अगाडि प्रदर्शन गरेका थिए ।

गाउँपालिका अध्यक्ष महतोले सीटीईभीटीका लागि शिक्षक नपाउने तथा गाउँपालिकाबाट स्वयंसेवक शिक्षक समेत राख्नलाई विज्ञापन समेत गरेकोमा उपाध्यक्षसहित बहुमत सदस्यको विरोधका कारण शिक्षक व्यवस्थापन हुन नसकेको आरोप लगाए ।