बारामा ३ सय ३२ फरार अभियुक्त पक्राउ- मधेस - कान्तिपुर समाचार
कान्तिपुर वेबसाईट
AdvertisementAdvertisement

बारामा ३ सय ३२ फरार अभियुक्त पक्राउ

लक्ष्मी साह

बारा — प्रहरीले बाराका विभिन्न स्थानबाट अपराधमा संलग्न भई अदालतबाट दोषी ठहर भएका ३ सय ३२ जना फरार आरोपितहरूलाई एकै दिन पक्राउ गरी अदालतमा बुझाएको छ ।

उनीहरुलाई सोमबार बिहानैदेखि बेलुकासम्म योजनाबद्ध ढंगले पक्राउ गरिएको प्रहरीले जनाएको छ । पक्राउ परेका त्यस्ता फरार प्रतिवादीहरुमध्येका कोहीलाई प्रहरीले देखेर पनि नदेखे झैं बेवास्ता गर्दै आएकाले यसअघि उनीहरु पक्राउ पर्न सकेका थिएनन् ।

केही भने प्रहरीलाई छलेर लुकीछिपी बस्दै आएका थिए । विभिन्न अपराध र कसुरमा दोषी ठहर भएर पनि जरिवाना तथा सजायबाट उम्केर बस्नेहरुको अदालत र प्रहरीमा लामै सूची छ ।

‘फैसला कार्यान्वयनमा ल्याई राज्यको विधि र कानुनको सम्मान गर्ने उदेश्यले फरारहरुलाई पक्राउ गर्ने अभियान अन्तर्गत पक्राउ गरिएको छ,’ प्रहरी उपरीक्षक होबिन्द्र बोगटीले भने, ‘लामो समयदेखि अदालतबाट कैद तथा जरिवानाको फैसला भई कानुनी कारबाहीको दायराबाट भाग्दै लुकीछिपी बस्दै आएका फरार प्रतिवादीहरूलाई पक्राउ गरिएको हो ।’

उनका अनुसार पक्राउ पर्नेहरूमा सबैभन्दा बढी ६ वर्ष ५ महिना १० दिन कैद सजाय भएका बारा कलैया उपमहानगरपालिका १ का विजय दासदेखि बैकिङ कसुर मुद्दामा ७ लाखसम्म जरिवानामा परेका पचरौता नगरपालिका २ का एजाजुल हक अन्सारी, हातहतियार खरखजाना मुद्दामा २ वर्ष ११ महिना ६ दिन कैद सजाय परेका निजगढ नगरपालिका १ बस्ने बासु चौधरी लगयात छन् । पक्राउ परेकामध्ये ३६ जनालाई पर्साको वीरगन्ज कारागार चलान गरिएको छ भने बाँकी जरिवाना भुक्तान गरी मुक्त भएका छन् । प्रहरीका अनुसार अधिकांश हत्या, सवारी ज्यान, हातहतियार तथा लागूऔषध ओसारपसार, किर्ते, चोरी डकैती, लेनदेनलगायत मुद्दाका दोषीहरु पक्राउ परेका हुन् ।

प्रकाशित : माघ १०, २०७९ १८:३८
प्रतिक्रिया
पठाउनुहोस्

ब्याजदरलाई वाञ्छित सीमामै राख्नुपर्छ : अर्थमन्त्री पौडेल

कान्तिपुर संवाददाता

काठमाडौँ — केही महिनायता बढेको ब्याजदर वाञ्छित सीमामा राख्न धेरै काम गर्नुपर्ने उपप्रधान तथा अर्थमन्त्री विष्णुप्रसाद पौडेलले बताएका छन् । ब्याजदर धेरै भएको अवस्थामा लगानी निरुत्साहित हुने भएकाले त्यसलाई जसरी भए पनि वाञ्छित सीमामै राख्नु पर्ने उनको भनाइ थियो ।

राष्ट्रिय वाणिज्य बैंकको ५८औं वार्षिकोत्सवको अवसरमा मंगलबार काठमाडौंमा आयोजित कार्यक्रममा अर्थमन्त्री पौडेलले यस्तो बताएका हुन् । ‘अर्थतन्त्रमा समस्या चुनौति र चाप छ । राजस्व परिरचालन चुनौतिपूर्ण बनेको छ । पुँजीगत खर्च सन्तोषजनक छैन । तरलता यथेष्ट छैन,’ उनले भने, ‘यस्तो अवस्थामा ब्याजदरलाई वाञ्छित सीमामा राख्न सकिएको छैन । जसका लागि धेरै काम गर्नु पर्नेछ ।’

सरकारी लगानीको बैंक भएकाले पनि राष्ट्रिय वाणिज्य बैंकलाई मुनाफामा मात्र केन्द्रित नभई सरकार र राष्ट्र बैंकका नीति कार्यान्वयनका साथै रोजगारी सिर्जनामा पनि प्रभावकारी रुपमा काम गर्न उनले निर्देशन दिए ।यस्तै, उत्पादनमूलक क्षेत्रमा कर्जा लगानी गर्न पनि अर्थमन्त्री पौडेलले बैंकलाई निर्देशन दिएका छन् ।

प्रकाशित : माघ १०, २०७९ १८:२५
पूरा पढ्नुहोस्
प्रतिक्रिया
पठाउनुहोस्
×