अञ्जान शाक्यलाई राष्ट्रिय सभा सदस्यमा मनोनीत गर्न सरकारको सिफारिस
काठमाडौँ — सरकारले अञ्जान शाक्यलाई राष्ट्रिय सभाको सदस्यमा मनोनीत गर्न राष्ट्रपतिसमक्ष सिफारिस गर्ने निर्णय गरेको छ ।
शुक्रबार बसेको मन्त्रिपरिषद्को बैठकले राष्ट्रिय सभाको रिक्त रहेको सदस्य पदमा शाक्यलाई मनोनयन गर्न सिफारिस गर्ने निर्णय गरेको सञ्चार तथा सूचना प्रविधिमन्त्री रेखा शर्माले जानकारी दिइन् ।
एमालेनिकट शाक्य यसअघि इजरायलका लागि पूर्वनेपाली राजदूत समेत हुन् । राष्ट्रिय सभामा ५९ सदस्यमध्ये निर्वाचनबाट ५६ जना र सरकारको सिफारिसमा राष्ट्रपतिबाट मनोनीत ३ जना सदस्य हुने व्यवस्था छ । जसमध्ये यसअघि मनोनीत सदस्य बिमला राई पौड्यालको गत फागुन २० मा पदावधि सकिएपछि रिक्त स्थानमा सरकारले शाक्यलाई मनोनीत गर्न सिफारिस गरेको हो ।
त्यसबेला पदावधि सकिएका २० मध्ये १९ पदमा भने निर्वाचन भएको थियो ।
प्रकाशित : चैत्र ३०, २०८० १५:५५