ताप्लेजुङ — एमाले निकटको अनेरास्ववियु र जसपा निकटको संघीय विद्यार्थी युनियनको तालाबन्दी र वर्षाका बीच पाथीभरा बहुमुखी क्याम्पसमा स्ववियु निर्वाचन जारी छ । बिहान ८ बजेदेखि गर्ने भनिएपनि ९ बजे पछि मात्रै मतदान सुरु भएको हो । रातिदेखि वर्षा भइरहेकाले विद्यार्थीहरु छाता ओढेर ढिलोगरी आइरहेका छन् ।
हठातमा निर्वाचन अधिकृत परिवर्तन गरिएको र परिचयपत्रमा क्युआर स्क्यान गर्दा पूर्ण विवरण नदेखिएको भन्दै दुई विद्यार्थी संगठनले मौन अवधि सुरु हुने दिन बेलुका क्याम्पस प्रशासन र निर्वाचन अधिकृतको कार्यालयमा तालाबन्दी गरेका थिए ।
पटक/पटकको छलफलमा सहमति नभएपछि शनिबार दिउँसो एमालेका निवर्तमान जिल्ला कमिटी अध्यक्ष बलबहादुर साम्वोहाङ सहितका नेताले क्याम्पसमै पुगेर निर्वाचन नगराउन चेतावनी दिएका थिए । क्याम्पस प्रशासनले निर्वाचन गर्ने एकिन गरेपछि जिल्ला प्रशासन कार्यालयमा शनिबार बेलुका सर्वदलिय, सर्वपक्षीय बैठक भएको थियो । उक्त छलफलमा पनि सहमति नजुटेपछि निर्वाचन सुरु भएको हो ।
निर्वाचन अधिकृत उमेश अधिकारीले जरुरी कामले विराटनगर जानुपर्ने भन्दै राजीनामा दिएपछि क्याम्पस प्रशासनले समितिका सदस्य युवराज बस्नेतलाई अधिकृत बनाएको छ । अधिकारीले भने कसैको दबाब र हठातमा नभइ आफ्नो विशेष कामले सबै विद्यार्थीलाई सुनाएर राजिनामा दिएको बताएका छन् । रातिदेखि वर्षा भएपछि पाल लगाएर मतदानस्थल बनाइएको छ ।
क्याम्पसमा एमाले र जसपा निकटका विद्यार्थी संगठनले एउटा र कांग्रेस निकटको नेविसंघ, माओवादी निकटको अखिल क्रान्तिकारी, नेकपा एस निकटको अनेरास्ववियु र संघीय लोकतान्त्रिक मञ्च निकटको विद्यार्थी संगठनले एउटा समूह बनाएका छन् ।
क्याम्पसमा ९ सय ८३ विद्यार्थी मतदाता रहेको निर्वाचन समितिले जनाएको छ ।
प्रकाशित : चैत्र ५, २०७९ ११:४१
