ओ, जेरुसलेम !

हज्जारौँ वर्षको भर्भराउँदो इतिहासमा

पटक-पटक

युद्धको हिंस्रक विभिषिका झेल्न अभिशप्त

तर कि‌वदन्तीको अग्निपन्छी फिनिक्सझैँ

प्रत्येक ध्व‌ंपछि पुन: जीवित हुँदै

नयाँ रूप, यौवन र ऊर्जाले प्रदीप्त ।

ओ, जेरुसलेम !

आज फेरि निस्सासिरहेको छ मानवता

यिनै स्तम्भहरूले घेरिएको पर्खालभित्र

स्वच्छ हावा हैन

फैलिइरहेको छ यी वृक्षहरूबाट

वायुमण्डलमा विषाक्त बारुदको आतंक !

र तिम्रो वरिपरि धरतीमा बगिरहेछ

पानीको सट्टा रगत !

तिमीभन्दा अलि पर रहेको गाजा बस्तीमा

गोलाबारीले क्षतविक्षत भएर

भग्नावशेषको थुप्रोले थिचिएको,

यो बालकको आँखामा गहिरिएर हेर,

र भन,

यो यहुदी हो? यो इसाई हो ? कि मुस्लिम हो ?

भन, उसको अपराध के थियो?

यो माटोमा जन्मिनासाथ उसलाई

आतंकको सास लिनुपर्ने स्थिति

कसले सिर्जना गर्‍यो ?

आफ्नै देशमा शरणार्थी बन्न

कसले बाध्य बनायो ?

कसले उसमाथि युद्ध थोपर्‍यो ?

र उसका निर्दोष सपनाहरूको हत्या गर्‍यो ?

औषधि, पानी, खाना र इन्धन

जानाजान र खुलेआम

ब्लकेड गरेर वर्तमानमा कसले लेखिरहेको छ,

यो अकल्पनीय क्रुरताको नवीन आलेख

आदिम बर्बरताको यो आधुनिक अभिलेख ?

ओ, जेरुसलेम!

नाजी कन्सन्ट्रेसन क्याम्पको

क्रुरतम अत्याचार झेलेका यहुदीहरू ,

यो भूमण्डलमा कतै पनि, कुनै पनि,

जमिनको टुक्रालाई देश भन्न नपाएका तिनै यहुदीहरू

यही ममतामयी माटोमा आश्रय खोज्न आएका होइनन् ?

यही करुणामयी भूमिमा आश्रय पाएका होइनन् ?

तर आश्रितहरूले टुक्रा-टुक्रा चपाउँदै

आश्रयदाताहरूको माटो निले,

हातमा अत्याधुनिक हतियार थियो

पिठ्युँमा महाशक्तिको धाप थियो

त्यसैको आडमा,धर्मग्रन्थको हकदाबीको आधारमा

जबर्जस्ती संगिनको टुप्पोले सीमारेखा कोरे ।

बिर्सेर आफ्नै अतीत

मेटामर्फोसिस हुँदै, बन्दै उत्पीडक राज्य

हिजोको उत्पीडित जाति, कोरिरहेको छ आज

उत्पीडनको एउटा अर्को क्रुरतम इतिहास !

हो, निन्दनीय छ हिंसात्मक हमास

तर विश्व साक्षी छ, ओ, जेरुसलेम !

त्यही क्रुरताको गर्भबाट बारम्बार जन्मिरहन्छ

नयाँ-नयाँ अवतारमा हमास।

तिमी भन्दा धेरै टाढा रहेको यो देशमा

तिम्रो पीडाको नदी बग्दैबग्दै हाम्रो समीप आउँछ,

हामीलाई लफ्रक्कै भिजाउँछ,

र हाम्रो आसपास हावामा सुसाउँछ

गाजाको बालकको आँखाबाट खसेको आँसु

हाम्रो अनुहारमा आँसुका डोब भएर बग्छ

तिम्रो सुस्केरामा मिसिएको छ हाम्रो पनि वेदना

युद्धोन्मादका बमवर्षाबीच

तिमीसँगै उभिएर गरिरहेका छौँ हामी पनि

सद्भाव र शान्तिको प्रार्थना ।

फिलिस्तिनीहरूको न्यायोचित मागको पक्षमा

सगरमाथाझैँ अविचल छ हाम्रो पक्षधरता,

तर यो पनि सत्य हो कि

देख्तैनौ हामी इज्रायली र फिलिस्तिनी आँखाहरूबाट बग्ने

नुनिला आँसुहरूबीच कुनै भिन्नता ।

विश्वका अन्य देशहरूझैँ यो देशका मान्छेहरू

तिमीतिर निर्निमेष हेरिरहेछन्

र तिमीलाई गर्ने प्रश्न

आफैंसित पनि गरिरहेछन्

कैयौं शताब्दीअघि अँगालेर सद्भाव र सहअस्तित्व

तिम्रै माटोले गरेको हो बर्बरयुगको उपहास

यो कहाली लाग्दो समयमा

ओ, जेरुसलेम !

सक्दैनौ र तिमीले दोहोर्‍याउन

अतीतको आफ्नो त्यो गौरवशाली इतिहास ??