कोरियाका नेपालीले मनाए बुद्धजयन्ती

धेरै विदेशी बस्ने सहरको रुपमा चिनिएको आन्सानमा मध्याह्न १२ बजेदेखि बुद्ध नेपालमा जन्मिएका हुन् भन्ने नारासहित सहर परिक्रमा गरिएको थियो ।

‘यहाँका धेरै कोरियालीहरुलाई बुद्ध नेपालमा जन्मिएका हुन् भन्ने थाहा छैन । यस्ता कार्यक्रमले नेपालमा हिमाल मात्रै होइन बुद्ध धर्मालम्बीको लागि एउटा धार्मिक गन्तब्य पनि छ भन्ने जानकारी हुन्छ । हामीले सबै मिलेर सकेको प्रचार गर्न सके सकारात्मक शन्देश जान्छ,’ नेपाल आदिवासी जनजाति महासंघ दक्षिण कोरियाका कार्यवाहक अध्यक्ष विशन राईले भने ।

नेपाली राजदूतावास, नेपाल आदिवासी जनजाति महासंघ, गैरआवासीय नेपाली संघ ख्यङ्गीईन्छन शाखा र सनातन साहित्य संगीत साधना समूह मिलेर कार्यक्रमको आयोजना गरेका हुन् ।

कार्यक्रम सहभागी भएका शिव शंकर थारु चौधरीले कोरियाको ठाउँमा भएको कार्यक्रम सकारात्मक रहेको प्रतिक्रिया दिए ।

‘आज बिहान पनि पानी परेको थियो । कोरियालीहरुले बुद्धका बारेमा सुनेका छन् । यसरी सार्वजनिक रुपमा कार्यक्रम गर्दा उनीहरुमा पनि चासो बढ्ने रहेछ । हामी सहर परिक्रमा गर्दा पनि धेरै कोरियालीले साचोपूर्वक हेरेका थिए,’ उनले भने ।

कोरियालीहरुले भने नेपालको बुद्धजयन्ती भन्दा पछि मे महिनाको २७ तारिखमा मनाउँदैछन् । बुद्ध जन्मिएको दिन अर्थात् ‘बुछनीम ओसिननाल’ भनिने कोरियामा सार्वजनिक बिदा दिनुको साथै यहाँ रहेका गुम्बा चैत्यमा पूजा गर्ने चलन छ ।

सन् २०१५ गरिएको जनगणना अनुसार ७६ लाख कोरियालीहरु बौद्ध धर्म मान्ने गर्छन् । कोरियाको राजधानी सोलमा वर्षेनि ५ लाखभन्दा बढी मानिसहरु सहभागी भएर ‘लोटस ल्यान्टर्न फेस्टिभल’ मनाउने गर्छन् । सो फेस्टिभलमा १ लाख भन्दा बढी लालटिनहरु बाल्ने गरिन्छ ।

विश्वका ३० भन्दा बढी देशका बौद्ध धर्मालम्बीहरु सहभागी हुने यो फेस्टिभल संसारका ठूला बौद्ध धार्मिक महोसत्वमा पर्छ भने युनेस्कोले ईन्टेन्जीवल कल्चरल हेरिटेजको लिस्टमा समावेश गरेको छ ।