पलेंटी कसेर, उपरखुट्टी लगाएर बस्ने समय मसँग छैन : ऊर्जामन्त्री लिङ्देन- भिडियो - कान्तिपुर समाचार
कान्तिपुर वेबसाईट
AdvertisementAdvertisement

पलेंटी कसेर, उपरखुट्टी लगाएर बस्ने समय मसँग छैन : ऊर्जामन्त्री लिङ्देन

कान्तिपुर संवाददाता

काठमाडौँ — उपप्रधान एवम् ऊर्जा, जलस्रोत तथा सिँचाइमन्त्री राजेन्द्रप्रसाद लिङ्देनले सार्वजनिक कार्यक्रममा आफूलाई लामो समय पलेंटी कसेर, उपरखुट्टी लगाएर बस्ने छुट र समय नरहेको बताएका छन् । शुक्रबारबाट काठमाडौंको भृकुटीमण्डपमा सुरु भएको नेपाल 'इलेक्ट्रिक्स पावर लाइट्स' अन्तर्राष्ट्रिय प्रदर्शनीको उद्घाटन गर्दै उनले यस्तो बताएका हुन् ।

‘कुनैपनि सार्वजनिक कार्यक्रममा लामो समय पलेंटी कसेर, उपरखुट्टी लगाएर बस्ने छुट र समय मलाई छैन’ उनले भने ‘संक्षिप्त समय निकालेर म आएको छु, यो सरकारले लगानीमैत्री वातावरण बनाउँछ ।’ अब उद्योग दर्तासम्बन्धी कुनै पनि प्रक्रियाका फाइल घुमिराख्ने प्रक्रिया अन्त्य हुने र एउटै टेबुलबाट सबै काम सक्ने प्रक्रियाको थालनी गर्ने उनले बताए । उनले देशभित्रका उद्योगी, व्यापारीहरुलाई ढुक्कसँग लगानी गर्न आग्रह गरे । सरकारले लगानीकर्ताको सम्पूर्ण सुरक्षाको जिम्मा लिने र लगानीको पूर्ण ग्यारेन्टी गर्ने उनको दाबी छ ।

मन्त्री लिङदेनले नेपालको ऊर्जा देशभित्र नै खपत गर्ने कुरामा लाग्नुपर्नेमा जोड दिए । उनले विद्युतीय सामग्रीहरुको बढी प्रयोग गरेर विद्युत् खपत बढाउनुपर्ने बताए । उनले भने ‘छिमेकीहरुसँग व्यापारको कुरा त छँदैछ तर देशभित्रै पनि ऊर्जाको खपत बढाउनुर्छ । विद्युतीय गाडी चलाउनुपर्छ । त्यसलाई सरकारले सजिलो बनाउनुपर्छ । ग्यासको साटो बिजुलीबाट खाना पकाउन थाल्नुपर्छ ।’ ग्यासबाट खाना पकाउने खर्चको आधा खर्चमा बिजुलीले पाक्ने उनले दाबी गरे । भृकुटीमण्डपमा सुरु भएको 'इलेक्ट्रिक्स पावर लाइट्स' अन्तर्राष्ट्रिय प्रदर्शनीमा स्वदेशी तथा विदेशी गरी करिब १ सय स्टल छन् ।


प्रकाशित : माघ ६, २०७९ १६:४९
प्रतिक्रिया
पठाउनुहोस्

हुम्लामा हिमपातले किसान हर्षित 

जनकबहादुर शाही

हुम्ला — हिमाली जिल्ला हुम्लामा बिहीबार रातिदेखि हिमपात भएपछि किसान खुसी भएका छन् । हुम्लामा यो वर्षकै पहिलो हिमपात भएको हो । बिहीबार बिहानदेखि मौसममा बदली भई हुम्लामा भारी हिमपात भएको छ । 

गत वर्षहरुमा पुस लाग्दा बित्तिकै धेरै पटक हिमपात हुने हुम्लामा यो पटक भने माघ पहिलो सातामा हिमपात भएको हो । हुम्लामा यो वर्षकै पहिलो हिमपात भएको प्रमुख जिल्ला अधिकारी सीता परियारले बताइन् ।

हिमपात भएपछि सिमकोट आसपासका गाउँबस्ती सेताम्य देखिएका छन् । हिउँ पर्ने क्रम जारी छ । हिमपातसँगै अत्यधिक चिसो बढेकाले जनजीवन भने प्रभावित भएको छ । हिमपातले गर्दा हुम्लाको एक मात्र हवाई यातायात सेवा पनि अवरुद्ध भएको छ ।

गत कात्तिकमा उत्तरी नाम्खामा हिउँ परे पनि सिमकोटमा भने पहिलो पटक हिउँ परेको हो । लामो समयपछि हिउँ पर्दा यहाँका स्थानीय बिहानैदेखि हिउँ खेलेर रमाइलो गर्न थालेका छन् । रातिदेखि लगातार हिमपात हुँदा उत्तरी नाम्खा गाउँपालिकाको वडा नं ६ लिमीका जनजीवन झन् कष्टकर बनेको प्रमुख जिल्ला अधिकारी परियारले बताइन् । उत्तरी हुम्लाका बस्तीहरुमा बाक्लो हिउँ जमेका कारण आवतजावतमा समस्या भएको स्थानीयवासीले बताएका छन् ।

मौसम बदलीका कारण जिल्लाको तापक्रम १४ डिग्री सेल्सियसमा झरेको छ । स्वास्थ्य संस्थामा बिरामीको चाप बढ्न थालेको चिकित्सक बताउँछन् ।


प्रकाशित : माघ ६, २०७९ १६:३१
पूरा पढ्नुहोस्
प्रतिक्रिया
पठाउनुहोस्
×