अञ्जनको ह्याट्रिकसँगै चर्च ब्वाइज शीर्षमा
काठमाडौँ — अञ्जन विष्टको ह्याट्रिकको मद्दतले चर्च ब्वाइजले सहिद स्मारक लिग ए डिभिजन ०७८–०८० मा शनिबार एनआरटीलाई ४–१ ले हराएको छ ।
यस जितसँगै चर्च ब्वाइज अंक तालिकको शीर्ष स्थानमा पनि उक्लेको छ । चर्च ब्वाइजको २७ अंक भएको छ र यो दोस्रोमा रहेको जावलाखेलमाथि तीन अंकको अग्रता हो ।
च्यासलमा भएको खेलमा अञ्जनले ८४ औं मिनेटमा पेनाल्टीबाट गोल गर्दै ह्याट्रिक पूरा गरे । यसपल्टको लिगमा यो तेस्रो ह्याट्रिक मात्रै हो । नेपाली खेलाडीका तर्फबाट भने यो पहिलो ३ गोलको प्रदर्शन रहेको छ ।
अञ्जनले ५१ र ६० औं मिनेटमा आफ्नो सुरुका दुई गोल गरे । यसअघि सुशील लामाले ३९ औं मिनेटमा गोल गर्दै चर्च व्वाइजलाई सुरआती अग्रता दिलाएका थिए ।
दिपेश आलेमगरले दोस्रो हाफको इन्ज्युरी समयको दोस्रो मिनेटमा एक गोल फर्काए । एनआरटी १७ अंकमै सीमित रह्यो । यता दशरथ रंगशालामा भएको खेलमा सातदोबाटो र मनाङ मर्स्याङदीले निराशाजनक गोलरहित बराबरी खेले । यो नतिजापछि सातदोबाटोको २३ अंक भयो भने मनाङले १९ अंक छोएको छ ।
प्रकाशित : वैशाख २३, २०८० १७:०६