आर्मीको जित, पुलिसलाई पहिलो अंक
काठमाडौँ — सहिद स्मारक लिग ए डिभिजन ०७९–०८० मा पुलिसले शनिबार पहिलो अंक बटुलेको छ । अर्को खेलमा आर्मी अन्तिम समयको गोलको मद्दतले पुनर्आगमन जित निकाल्न सफल रह्यो । दशरथ रंगशालामा भएको खेलमा पुलिसले एनआरटीसँग १–१ को बराबरी खेलेको हो ।
पाँचौं खेलमा आएर पुलिस १ अंक बटुल्न सफल भएको हो । तर पुलिस अझै पनि लिग तालिकको अन्तिम स्थानमा छ र रेलिगेसनको चर्को दबाबमा गुज्रिरहेको छ । एनआरटी आफै पनि खराब लयमा छ र उसको २ अंक भएको छ ।
एनआरटीले सञ्जीव विष्टको गोलले अग्रता लिएको थियो । त्यसयता पुलिसका लागि प्रताप गुरुङले बराबरी गोल गरे । एनआरटी पुलिसको ठीक अगाडि १३ औं स्थानमा छ । च्यासलमा भएको खेलमा भने आर्मीले फ्रेन्ड्सलाई २–१ ले हराएको हो ।
दीपक गुरुङले दोस्रो हाफको इन्ज्युरी समयको चौथो मिनेटमा गोल गरेका हुन् । त्यस अगाडि फ्रेन्ड्सले छैटौं मिनेटमा रफिक अमिनुको गोलले अग्रता लिएको थियो ।
जिलेप्सी जंग कार्कीले २४ औं मिनेटमा गोल गरेपछि खेल बराबरीमा पुगेको थियो । यो जितपछि आर्मीको ८ अंक भएको छ । फ्रेन्ड्स भने ४ अंकमै सीमित रह्यो ।
प्रकाशित : चैत्र ४, २०७९ १७:०२
