पाल्पा — पाल्पाको रैनादेवी छहरा गाउँपालिका–८, सत्यवतीमा भीरबाट खसेको ढुंगा लागेर एक जनाको मृत्यु भएको छ । स्थानीय ७० वर्षीय रनबहादुर रेश्मीको मृत्यु भएको हो ।

जिल्ला प्रहरी कार्यालयका अनुसार घर नजिकैको भल्टेखानी गैरामा खानेपानीको पाइप बनाउन गएका रेश्मीलाई माथिल्लो भागबाट खसेको ढुंगाले लागेर मृत्यु भएको हो ।

आफन्तहरु खोजतलास गर्दै जाँदा रेश्मी खोल्सामा मृत अवस्थामा भेटिएको र प्रहरी चौकी बल्ढेङगढीले अनुसन्धानमा माथिल्लो भेगबाट खसेको ढुंगाले लागेर मृत्यु भएको देखिएको जनाएको छ ।

प्रारम्भिक अनुसन्धानपछि शव पोष्टमार्टमका लागि लुम्बिनी प्रादेशिक अस्पताल बुटवल लगिएको प्रहरी नायव उपरीक्षक तथा सूचना अधिकारी वीरेन्द्र थापाले जानकारी दिए । घटनाको थप अनुसन्धान भइरहेको प्रहरीले जनाएको छ ।