वर्षाले कृषकलाई राहत
कञ्चनपुर — वर्षा भएपछि सुदूरपश्चिममा कृषकहरू खुसी भएका छन् । आइतबार रातिदेखिको वर्षाले किसानलाई राहत पुगेको छ । ‘अहिलेको वर्षाले नोक्सान पुर्याउँदैन, बालीनालीलाई पोसिलो बनाउन सहयोग पुग्छ,’ कृषि ज्ञान केन्द्र कञ्चनपुरका कृषि अधिकृत हरिदत्त जोशीले भने, ‘यो वर्षा एक/डेढ महिनाअघि नै हुनुपर्थ्यो, ढिलो भए पनि केही राहत भएको छ ।’
कञ्चनपुरमा करिब ३५ हजार हेक्टरमा गहुँ खेती गरिन्छ । यहाँ गहुँको उत्पादकत्व ४ मेट्रिक टन प्रतिहेक्टर छ । पाक्न लागेको गहुँ वर्षाले ढलाएमा नोक्सान हुने भए पनि हावा हुरी नचलेका कारण क्षति नभएको प्राविधिकहरू बताउँछन् ।
तराईमा अहिले तोरी र मसुरो भित्र्याउने बेला हो । ९० प्रतिशत तोरी भित्र्याइसकेको ज्ञान केन्द्रको भनाइ छ । केही भित्र्याउन बाँकी रहेको तोरीलाई केही असर गर्न सक्ने ज्ञान केन्द्रका कृषि अधिकृत जोशीले बताए । वसन्ते तरकारी र मकैलाई पनि अहिलेको वर्षाले फाइदा पुग्ने कृषि प्राविधिकहरू बताउँछन् । सिँचाइका लागि पानीको आवश्यकता थियो । यहाँ बगर खेतीमा पनि वसन्ते तरकारीको उत्पादन हुने गर्छ ।
बगर खेतीमा हुने तरकारी उत्पादन काठमाडौंसम्म पुग्छ । उक्त उत्पादन बजारमा आउन थालेको छ । जिल्लाका खोलानालाका किनारमा बगर खेती भइरहेको छ । कृषि ज्ञान केन्द्रका अनुसार ५० हेक्टरमा बगर खेती भइरहेको छ । यहाँ काँक्रा, फर्सी, लौका, करेला र तरभुजालगायतको उत्पादन भएको छ । ‘बगरमा पनि सिँचाइको आवश्यकता थियो, अहिले वर्षाले सहज भयो,’ जोशीले भने, ‘वसन्ते तरकारी उत्पादनमा पनि यसले फाइदा नै पुग्छ ।’
जिल्लाको दक्षिणी क्षेत्र बेलौरी र पुनर्बास नगरपालिकामा ठूलो मात्रामा वसन्ते मकैको खेती गरिन्छ । यसमा समेत फाइदा पुग्ने उनले बताए । आँप, लिचिलगायतका फलफूललाई समेत अहिलेको वर्षाले फाइदा पुग्ने जोशी बताउँछन् । हावाहुरी नचलेकाले नोक्सान नभएको उनको भनाइ छ । उनका अनुसार राम्ररी फुलेको आँप र लिचीमा किसानले काँटछाँट गरेर ६० प्रतिशत मात्रै राख्नुपर्ने हुन्छ । वर्षाले अनावश्यक फूल झरेर किसानको काम सहज गरेको उनले बताए । यो वर्ष आँप र लिची राम्रोसँग फुलेको छ । उत्पादन गत वर्षको तुलनामा राम्रो हुने अपेक्षा छ ।
जल तथा मौसम विज्ञान विभागको अत्तरियास्थित फिल्ड कार्यालयका अनुसार कैलाली र कञ्चनपुरमा सोमबार २९.७ मिलिमिटर वर्षा भएको छ ।
प्रकाशित : चैत्र ७, २०७९ ०८:१२
