सुदूरपश्चिम प्रदेशसभा बैठकमा नागरिक उन्मुक्तिका सांसद अनुपस्थित
धनगढी — मुख्यमन्त्रीले विश्वासको मत लिने प्रयोजनका लागि राखिएको बिहीबारको सुदूरपश्चिम प्रदेशसभा बैठकमा नागरिक उन्मुक्ति पार्टीका सांसदहरु अनुपस्थित रहेका छन् । विश्वासको मत प्राप्त गर्न नागरिक उन्मुक्तिको भर गरेको एमाले नेतृत्वको प्रदेश सरकारलाई नागरिक उन्मुक्तिका सांसदहरुको अनुपस्थिततिका कारण विश्वासको मत नपाउने अवस्थामा पुगेको छ ।
विश्वासको मत जुटाउन अन्तिम समयसीमासम्म कसरत गरेका रावल र उनको पार्टी एमालेले नागरिक उन्मुक्ति पार्टीलाई मनाउन सकेनन् । नाउपाले पार्टीका संरक्षक रेशम चौधरीको रिहाइलाई बटमलाइन बनायो र त्यस मागमा टसमस नभएर विश्वासको मत नदिने निर्णय गर्यो । पार्टी अध्यक्ष रञ्जिता चौधरीले आफ्ना सांसद तटस्थ बस्ने बताएकी थिइन् । अहिले मुख्यमन्त्री रावल प्रदेशसभाको बैठकलाई सम्बोधन गरिरहेका छन् ।
एमाले, माओवादी, नाउपा र राप्रपाको समर्थनमा मुख्यमन्त्री रावलसँगै माओवादी केन्द्र संसदीय दलका नेता खगराज भट्ट र एमाले संसदीय दलका उपनेता सन्तोष शर्मा थापा बिनाविभागीय मन्त्री नियुक्त भएका थिए ।
