पडरीका अग्नीपीडितलाई लत्ताकपडा र खाद्यान्न 

वैशाख ७ गते पडरी गाउँमा आगलागी हुँदा ११ वटा घर जलेर नष्ट भएको थियो । अन्नपात र लत्ताकपडासमेत जल्दा पीडित छिमेकीको घरमा शरण माग्नुपर्ने अवस्था छ । गाउँपालिकाले तत्कालका लागि छाक टार्न खाद्यान्न सामग्री उपलब्ध गराएको थियो भने अहिले रेडक्रस र विभिन्न संघसंस्थाले कपडा, बिछ्याउन र खाध्यान्न सहयोग गरेका छन् ।

खाद्य सामग्रीसहित पीडितहरुलाई आवश्यक त्रिपाल, कम्मल, झुल, लत्ताकपडा, भाडाकुँडा उपलब्ध गराएको जिल्ला रेडक्रस शाखा परासीका सभापति राजेन्द्र अग्रहरीले बताए । आगलागीको कारण लत्ताकपडा र अन्न पनि नष्ट भएपछि पीडित परिवारको बिचल्ली भएको छ । गाउँपालिका, रेडक्रस, युवा संघ र नेपाली कांग्रेसका केन्द्रीय सदस्य देवेन्द्रराज कँडेलले पनि पीडितलाई राहत सामग्री उपलब्ध गराएका छन् ।

जिल्लामा आगलागीका घटना बढेका छन् । एक हप्तामा मात्र जिल्लामा १६ वटा कच्ची घर जलेर नष्ट भएको छ । पीडितले भने खाद्यान्न र लत्ताकपडासँगै बस्नका लागि घर बनाउन आवश्यक सहयोगको माग गरेका छन् ।