(रूपन्देही) — लुम्बिनी प्रदेशका मुख्यमन्त्री लीला गिरीलाई राजीनामाको दबाब दिन कांग्रेसले आइतबार प्रदेश प्रमुखसमक्ष मुख्मन्त्रीमा दाबी पेस गरेको छ । कांग्रेस संसदीय दलका नेता डिल्लीबहादुर चौधरीले माओवादी केन्द्र, जनमत, जसपा, लोसपासहित आठ पार्टी र एक स्वतन्त्र सांसदको समर्थनमा मुख्यमन्त्रीमा नियुक्त गर्न माग गर्दै प्रदेश प्रमुख अमिक शेरचनसमक्ष दाबी पेस गरेका हुन् ।
माओवादीसहितका सरकार समर्थित दलहरु आइतबारै समर्थन फिर्ता लिँदै मन्त्रीबाट हटेपछि चौधरीलाई मुख्यमन्त्री नियुक्तिको माग सहितको हस्ताक्षर बोकेर प्रमुख प्रमुखसमक्ष पुगेका थिए ।'मुख्यमन्त्रीजीलाई हामीले राजीनामा दिनुहोस् भनेका छौं । उहाँले दिनुहुन्छ भन्नेमा विश्वस्त छौं । त्यसैले हामीले नयाँ मुख्यमन्त्री नियुक्तिका लागि प्रक्रिया अघि बढाएका हौं,' माओवादी लुम्बिनी प्रदेश अध्यक्षसमेत रहेका निवर्तमान मन्त्री सुदर्शन बरालले भने ।
संघीय सरकारमा एमाले र माओवादीको गठबन्धन टुटेसँगै यसको प्रभाव प्रदेश सरकारमा पनि परेको हो । कांग्रेस संसदीय दलका नेता चौधरीले ५४ सांसदको समर्थन आफूसँग रहेको दाबी गर्दै मुख्यमन्त्री नियुक्त हुन निवेदन पेस गरेका हुन् ।
चौधरीलाई कांग्रेस, माओवादीका दलका नेता जोखबहादुर महरा, नागरिक उन्मुक्ति पार्टीका दलका नेता धर्मबहादुर चौधरी, लोसपाका दलका नेता सन्तोषकुमार पाण्डेय, जनमत पार्टीका दलका नेता चन्द्रकेश गुप्ता, जसपाका दलका नेता भण्डारीलाल अहिर, एकीकृत समाजवादीका दलका नेता भगवती अधिकारी, जनमोर्चाका दलका नेता तारा थापा र स्वतन्त्र सांसद खड्क बस्नेतले हस्ताक्षर गरेर मुख्यमन्त्री बनाउन भनेका छन् ।
मुख्यमन्त्री लीला गिरीलाई दिएको समर्थन पार्टीहरुले फिर्ता लिएपनि संवैधानिक व्यवस्थाअनुसार उनलाई ३० दिनभित्र प्रदेश संसद्मा बहुमत सिद्ध गर्ने समयसीमा रहन्छ । मुख्यमन्त्री गिरीले ३० दिनभित्र प्रदेश संसद्मा बहुमत कायम रहेको सिद्ध गर्न नसके उनी स्वत: पदमुक्त हुनेछन् । यसको अलावा मुख्यमन्त्री गिरीले राजीनामा गरेमा मात्रै अर्को मुख्यमन्त्री चयन गर्न मिल्छ ।
