बागेश्वरी मन्दिरमा महाआरती

नाट्टा बाँके च्याप्टर नेपालगन्ज र वेष्टर्न ट्राभल मार्ट नेपालको आयोजना एवम् नेपालगन्ज उपमहानगरपालिका र बागेश्वरी मन्दिर गुठी व्यवस्थापन समितिको सहकार्यमा महाआरती गरिएको हो । सोमबार महाआरतीमा नेपालगन्जका नगरप्रमुख प्रशान्त विष्ट र उनकी पत्नी रेखा विष्ट प्रमुख कर्ताका रुपमा थिए । सर्वसाधारणको उल्लेख्य उपस्थितिमा गरिएको महाआरती उल्लासपूर्ण देखियो ।

नगरप्रमुख विष्टले बागेश्वरी मन्दिरमा अब प्रत्येक सोमबार महाआरती गर्ने गरी नेपालगन्ज उपमहानगरपालिकाले सहयोग गर्ने बताए । उनले महाआरतीलाई नियमित रुपमा सञ्चालन गर्न आफू प्रतिबद्ध रहेको बताए ।

‘यसलाई मासिक दुई पटक निरन्तरता दिइने छ,’ नगर प्रमुख प्रशान्त विष्टले निरन्तर सहयोगको प्रतिबद्धता व्यक्त गर्दै भने, ‘सहयोग र समन्वय जुट्दै गयो भने दैनिक हुनसकोस् भन्ने चाहना छ ।’

यस्तै उनले जुंगे महादेवसम्मको पुललाई पुनर्निर्माणका लागि टेण्डर भइसकेको जानकारी दिँदै बागेश्वरी परिसरको छेउमै रहेको गौशाला हनुमानगढी नजिक १ सय ८ फिटको हनुमान मूर्ति बनाउने काम छिट्टै सुरु हुने बताए ।

नाट्टा अध्यक्ष श्रीराम सिग्देलले महाआरतीलाई नियमित गर्न सरोकारवाला सबै पक्षको इमान्दार सहयोग रहने विश्वास व्यक्त गरे । उनले धार्मिक पर्यटन प्रवर्द्धनमा यसले ठूलो सहयोग पुग्ने बताए ।

पश्चिम नेपालको प्रसिद्ध शक्तिपीठ बागेश्वरी मन्दिरमा पहिलोपटक नेपालगन्ज उपमहानगरपालिकाको सहयोगमा माघ १५ गते महाआरती गरिएको थियो । नाट्टा बाँके च्याप्टरको पहल र प्रयासमा बागेश्वरी मन्दिर व्यवस्थापन गुठीले आयोजना गरेको महाआरतीका लागि नेपालगन्ज उपमहानगरपालिकाले आर्थिक सहयोग गरेको छ । बागेश्वरीलाई धार्मिक पर्यटकीय दृष्टिले महत्त्वपूर्ण गन्तव्यका रूपमा लिँदै नाट्टा बाँके च्याप्टरले पर्यटकीय आकर्षणका लागि महाआरतीको परिकल्पना गरेको बताइएको छ ।