सालिन पोखरेल मृत्यु प्रकरण : पक्राउ परेका शिक्षकलाई धरौटीमा छाड्न आदेश

चितवन प्रहरीले विद्यालयका प्रधानअध्यापक बालहरि देवकोटा, सहायक प्रधानअध्यापक कमल शर्मा पौडेल र होस्टेल इन्चार्ज रहेका अर्का शिक्षक किरणबहादुर अधिकारीलाई फागुन १५ मा नियन्त्रणमा लिएको थियो ।

चितवन जिल्ला अदालतमा मंगलबार भएको थुनछेक आदेशमा पौडेल र अधिकारीलाई पाँच पाँच लाख रुपैयाँ धरौटी र प्रधानाध्यापक देवकोटलाई तीन लाख रुपैयाँ धरौटी लिएर छाड्न न्यायाधीश रमेशप्रसाद ज्ञवालीले आदेश गरेको अदालतका सूचना अधिकारी अमृत विश्वकर्माले जानकारी दिए । फागुन १२ गते विद्यायलयको छात्रावासको कोठामा सालिनको शव पंखामा झुन्डिएको अवस्थामा भेटिएको थियो । सालिनका अभिभावकले मृत्यु स्वाभाविक नभएको र बलात्कारपछि हत्या भएको भन्दै चितवन प्रहरीमा किटानी जाहेरी दिएका थिए् ।

सालिनको पोस्टमार्टम पनि चितवनमा नभएर काठमाडौं महाराजगञ्जको त्रिवि शिक्षण अस्पतालमा भएको थियो । चितवन प्रहरीलाई प्राप्त भएको पोस्टमार्टम रिपोर्टमा झुण्डिएर मृत्यु भएको र बलात्कारको पनि संकेत नभएको उल्लेख थियो । त्यसै गरी अन्य परीक्षणहरू र अनुसन्धान प्रतिवेदनका आधारमा आत्महत्या दुरुत्साहनमा आइतबार चितवन जिल्ला अदालतमा मुद्दा दायर भएको थियो ।