सेवाकेन्द्र सार्नुपार्ने मागसहित प्रदर्शन
महोत्तरी — महोत्तरीको रामगोपालपुर नगरपालिकाभित्र मालपोत र नापीको सेवा कार्यालय माग गर्दै रामगोपालपुरमा प्रदर्शन गरिएको छ । जिल्लाको पायक पर्ने स्थान रामगोपालपुरमा सेवा कार्यालय दिनुपर्ने मागसहित स्थानीयले बजार र सडक बन्द गर्दै आन्दोलन सुरु गरेका हुन् ।
सदरमुकाम जलेश्वरमा रहेको मालपोत र नापीको सेवा कार्यालय गौशालामा स्थापना गर्ने भनी २ वर्ष पहिले सरकारले निर्णय गरेको थियो ।
२०७८ चैत २२ गते नेपाल सरकारले गौशालामा सेवा कार्यालय स्थापना गर्ने भनी गरेको निर्णय अव्यवहारिक र अपरिपक्क भएको र जिल्लाको पायक स्थानमा सेवा कार्यालय स्थापना गर्नुपर्ने रामगोपालपुर नगरपालिकाका मेयर राम दुलार साहले बताए ।
गौशालामा कार्यालय स्थापना हुँदा जिल्लाको मनराशिसवा, रामगोपालपुर, लोहारपट्टि, औरही, सोनामा र सम्सी पालिकाका स्थानीयलाई सेवा लिन अपायक पर्ने मेयर साहले बताए ।
धर्ना, मसाल जुलुस, सडक र बजार बन्द जस्ता कार्यक्रम गरी अहिले माग सम्बोधन गर्न दबाब दिइएको आन्दोलनमा सहभागीले बताएका छन् । विरोधस्वरुप आइतबार ४ घण्टा बजार र सडक बन्द गराएको आन्दोलन समितिका संयोजक वैधनाथ साहले जानकारी दिए ।
मेयर साहसहितको नेतृत्वमा भएको आन्दोलनले गौशालामा सेवा कार्यालय स्थापना गर्ने निर्णय बदर गराई रामगोपालपुरमै कार्यालय स्थापना गर्न कडा आन्दोलन गर्ने आन्दोलन समितिले बताएको छ । महोत्तरी क्षेत्र नं ४ अन्तर्गतका सयौँ नेता कार्यकर्ता र स्थानीय जोडिएर सर्वपक्षीय समिति गठन गरी रामगोपालपुरमा सेवा केन्द्र माग गरिरहेका छन् ।
सरकारले आफूहरुको माग सुन्नुपर्ने र व्यवहारिक तवरबाट सेवा कार्यालय सबै पालिकाको पायक पर्ने स्थानमा स्थापना हुनुपर्ने उनीहरुको माग छ ।
प्रकाशित : असार २४, २०८० १३:२८