म्याद नसकिँदै निर्माण गरिसक्ने कम्पनीलाई २३ लाख बोनस

सो कम्पनीले भेटेरिनरी अस्पताल तथा पशु सेवा विज्ञ केन्द्रको भवन निर्माण सम्झौता भन्दा अघि नै सम्पन्न गरेपछि सो बोनसमा २३ लाख रुपैयाँ प्राप्त गरेको हो । कम्पनीका प्रवन्ध निर्देशक मिगुर शेर्पाले छिटो निर्माण सम्पन्न गरेबापत् २३ लाख रुपैयाँ बोनस पाएको बताए ।

भवनको काम २०७९ बैशाख १६ मा सम्झौता गरेर २०८१ बैशाख १६ मा सम्पन्न हुनु पर्ने थियो । निर्माण कम्पनीले सम्झौता भन्दा ५ महिना २८ दिन अघि नै सम्पन्न गरेर हस्तान्तरण गरेको थियो । ३ करोड ९९ लाखमा ठेक्का आहृवान गरेको भवन निर्माणको काम अरुण बरुण निर्माण सेवा कम्पनीले २ करोड ९५ लाखमा नै निर्माण गर्ने गरी सम्झौता गरेको थियो ।

म्याद भन्दा अघिनै निर्माण कार्य सम्पन्न गरेबापत् निर्माण व्यवसायीलाई सम्झौता भन्दा बढी २३ लाख रुपैयाँ बोनसस्वरुप दिइएको पशु सेवा विज्ञ केन्द्रका प्रमुख हिमालय पोख्रेल जानकारी दिए ।

सो भवनको सोमबार एक कार्यक्रमकाबीच कोशी प्रदेश उद्योग, कृषि तथा सहकारी मन्त्री रामकुमार खत्रीले नवर्निमित भवन उद्घाटन गरे ।

म्याद अगाबै भवन निर्माण सम्पन्न गरेकोमा उनले निर्माण व्यवसायीलाई धन्यवाद दिए । उनले निर्माण कम्पनीका प्रवन्ध निर्देशक मुगुर शेर्पालाई सम्मानपत्र समेत हस्तान्तरण गरे ।

६ महिना अघिदेखि नयाँ भवनमा काम सुरु भएपनि उद्घाटन भने सोमबार गरिएको हो । भेटेरिनरी अस्पताल तथा पशु सेवा विज्ञ केन्द्रले संखुवासभा र भोजपुरमा सेवा प्रवाह गर्ने गरेको छ ।