आफ्नै प्रदेश राजधानी पुग्न काठमाडौं ट्रान्जिट
सोलुखुम्बु — सोलुदूधकुण्ड नगरपालिकाका प्रमुख नाम्गेलजाङ्बु शेर्पालाई प्रदेशस्तरीय गोष्ठीमा भाग लिन विराटनगरबाट हालै निम्तो आयो । उनी प्रदेश राजधानी पुग्नकै लागि पहिले फाप्लुबाट काठमाडौं पुगे, अनि त्यहाँबाट अर्को उडानमा विराटनगर ओर्लिएर गोष्ठीमा सहभागी भए ।
सोलुदूधकुण्ड–८ का प्रकाश मगरलाई योजना सम्झौताका लागि विराटनगरस्थित प्रदेशको मन्त्रालय जानुपर्ने भयो । उनी पनि नगर प्रमुख शेर्पाले जस्तै फाप्लुबाट काठमाडौं पुगेर अर्को उडानमार्फत विराटनगर झरे ।
सोलुखुम्बुवासीलाई आफ्नै प्रदेश राजधानी विराटनगर पुग्न सोझो हवाई उडान नहुँदा काठमाडौंदेखि फेरो मारेर जानुपर्ने बाध्यता छ । फाप्लु, स्याङबोचे, तेन्जिङ–हिलारी र कांगेली डाँडा गरी देशकै सर्वाधिक बढी विमानस्थल भए पनि सोलुखुम्बुबाट प्रदेश राजधानी विराटनगर जान भने एउटै सोझो उडान छैन । जोखिमपूर्ण र अव्यवस्थित सडकका कारण स्थलमार्ग हुँदै यात्रा गर्नु कठिन र कम प्राथमिकतामा पर्ने गर्छ । संघीयतापूर्व सबै काम काठमाडौंबाटै हुने गरेकामा तीन तहको सरकारको अवधारणा लागू भएसँगै यहाँका स्थानीयलाई आवागमनमा कठिनाइ हुन थालेको हो । ‘पहिला विराटनगर जाने काम नै पर्दैनथ्यो, आजकाल प्रदेश मन्त्रालय भएपछि त स–साना कामका लागि पनि विराटनगर जानैपर्छ,’ स्थानीय प्रकाश मगरले भने, ‘आफ्नै प्रदेशको राजधानी जान पनि विदेश नै गए जस्तो काठमाडौंको ट्रान्जिट फ्लाइट प्रयोग गर्नुपर्ने बाध्यता छ ।’
यसअघिकै प्रदेश सांसद र सरकारले फाप्लु–विराटनगरको सिधा उडानको आश्वासन दिए पनि ४ वर्षदेखि प्रदेश राजधानीमा सिधा उडान हुन सकेको छैन । तत्कालीन समयमा नेपाल वायु सेवा निगमले साताको बुधबार एउटा उडान विराटनगर गर्दै आएको थियो । यात्रु अभाव समस्या देखाउँदै उडान बन्द गरेको सरकारी वायु सेवा निगमको उडान पुनः सुरु गराउन त्यसयता ठोस पहल नहुँदा प्रदेश राजधानी जान निकै कठिन हुने गरेको छ ।
यता सडक यातायातको अवस्था पनि निकै जोखिमपूर्ण छ । विराटनगर जानका लागि बीच भागमा पर्ने घुर्मी–कटारी सडक खण्डको डरमर्दो कच्ची बाटोमा ज्यान नै धरापमा राखेर हिँड्नुपर्ने अवस्थाका कारण पनि नागरिकहरू सडकमार्गको जोखिम मोल्न तयार देखिँदैनन् । ‘वर्षौंदेखि घुर्मी–कटारी सडक खण्डको बेहाल छ, कालोपत्र उप्किएर धूले सडकमा परिणत भएको १० वर्ष बित्दा पनि उक्त सडक निर्माणमा कसैको ध्यान गएको छैन,’ स्थानीय पत्रकार सन्तोषकुमार राउतले भने ।
उनका अनुसार उक्त सडक खण्डमा सवारीसाधनमा यात्रा गरिसकेपछि खाल्डाखुल्डीमा उफ्रिँदा र विषाक्त धूलोका कारण यात्रु बिरामी पर्छन् । सोलुदूधकुण्ड नगरपालिकाभित्र पर्ने फाप्लु विमानस्थल सञ्चालनका लागि सरोकारवाला निकायमा पटकपटक पहल गरेको मेयर नाम्गेलजाङ्बु शेर्पाको भनाइ छ । ‘हामी सबै जनप्रतिनिधिको पहलमा उडान तालिका राखिएको पनि थियो, तत्कालीन अवस्थामा उडान सुचारु हुन सकेन,’ मेयर शेर्पाले भने ।
सरकारी ध्वजावाहक नेपाल वायु सेवा निगमले भने विमान अभावकै कारण फाप्लु–विराटनगर उडान राख्न नसकेको बताएको छ । उडान राख्न माग भए पनि नयाँ विमान ल्याउने प्रक्रियामा रहेकाले त्यसपछि मात्रै उडान भर्न सकिने निगमको भनाइ छ । ‘हामीसँग पर्याप्त जहाज नै छैन,’ निगमका कार्यकारी अध्यक्ष युवराज अधिकारीले कान्तिपुरसँग भने, ‘अब थपिनासाथ उक्त रुटमा प्राथमिकताका साथ उडान राख्छौं ।’
यस क्षेत्रबाट प्रदेशसभामा निर्वाचित भई सामाजिक विकासमन्त्री बनेका बुद्धिकुमार राजभण्डारीले फाप्लु–विराटनगर र विराटनगर–लुक्ला सिधा उडानका लागि प्रयत्न भइरहेको बताए । ‘पर्यटन मन्त्रालय, पर्यटन व्यवसायी र विमान सञ्चालकहरूसँग त्रिपक्षीय संवाद भइरहेको छ,’ उनले भने, ‘अब चाँडै सिधा उडानको प्रयत्नले सार्थकता पाउँछ ।’ सोलुखुम्बुम्मा कांगेल डाँडा, फाप्लु, लुक्ला र स्याङबोचे गरी ४ वटा विमानस्थल छन् । महाकुलुङमा अर्को विमानस्थल थप गर्नका लागि जग्गा व्यवस्थापन र अध्ययनको काम अगाडि बढाइएको छ ।
प्रकाशित : माघ २२, २०७९ ०७:५४
