निर्माणमा ढिलाइ गर्नेलाई हर्जाना

कान्तिपुर संवाददाता

हेटौंडा — मकवानपुरको उत्तरी क्षेत्रमा पर्ने दामन–डाँडावाँस सडक स्तरोन्नति ठेक्का लिएको निर्माण कम्पनीले काममा ढिलाइ गरेकाले जिल्ला समन्वय समितिले सम्बन्धित कम्पनीलाई २ लाख हर्जाना तिराएको छ ।

चालू आवको असार मसान्तसम्म काम सक्नुपर्ने कम्पनीले अहिलेसम्म २५ प्रतिशतमात्र निर्माण सकेकाले हर्जाना तिराएको हो ।

‘कामको प्रगतिदर सुस्त भएकाले हर्जाना तिराएका हौं’, प्राविधिक कार्यालय प्रमुख सोमप्रसाद तिमल्सिनाले भने, ‘निर्माण कार्यको प्रगतिदर बढेन भने अझ ४ लाख रुपैयाँ हर्जाना तिराउनु पर्ने हुन्छ ।’ २४ सै घन्टा काम गरेर तोकिएकै समयभित्र काम सम्पन्न गरेमा उक्त कम्पनीलाई हर्जाना रकम फिर्ता गर्नुपर्ने कानुनी व्यवस्था छ ।

महालक्ष्मी/सिंह एन्ड ब्रर्दस जेभी कम्पनीले उक्त सडकको स्तरोन्नति गर्न करिब ९ महिना अघि ठेक्का लिएको हो । तीन महिना भित्रमा उक्त सडकको स्तरोन्नति कार्य सम्पन्न गर्नु पर्नेछ । ७५ प्रतिशत काम तीन महिनामा सम्पन्न गर्न कठिनाइ छ प्राविधिक कार्यालयका इन्जिनियरले भने, ‘मंसिरदेखि माघसम्म काम नगरेकाले समस्या भएको हो । तराई क्षेत्रबाट ल्याएका कामदा जाडोका कारणले मंसिरदेखि माघसम्म काम गर्न आएनन् । दामन–डाँडावासको ११ किलोमिटर बाटो ६ मिटर फराकिलो बनाउनुपर्ने, नाली खन्नुपर्ने, ग्याभिनको काम गर्नु पर्ने र चार मिटर ओटाशिल गर्न उक्त कम्पनीले करिब ७ करोडमा ठेक्का लिएको हो ।

राष्ट्रिय ग्रामीण यातायात सुदृढीकरण कार्यक्रम अन्तर्गत उक्त मोटरबाटोको स्तरोन्नति गर्न लागेको हो । हालको थाहा नपाको शिखरकोटदेखि आग्राको डाँडाबाससम्म ओटासिल गर्ने कार्यक्रम छ । उक्त मोटरबाटो राम्रो भएमा थाहा नपाको आग्रामात्र होइन, कैलास गाउँपालिकाको गोगने र डाँडाखर्कका बासिन्दा पनि लाभान्वित हुनेछन् । ‘यहाँ उत्पादित तरकारी र कृषिजन्य वस्तुको सहज ढंगले बजारमा पहुँच हुने थियो’ डाँडाखर्कका बेलमान थिङले भने, ‘यो वर्षको वर्षायाममा पनि मोटरबाटो बन्ला जस्तो छैन ।’

प्रकाशित : चैत्र १८, २०७३ १०:१९
ADVERTISEMENT
प्रतिक्रिया
पठाउनुहोस्
ADVERTISEMENT

नियम मिचेर बालुवा उत्खनन

पवन यादव

रौतहट — जिल्लास्थित बाग्मती नदीको माधोपुर घाटबाट २ महिनादेखि अवैध रूपले बालुवा उत्खनन भइरहेको छ । स्थानीय निकायले नदीजन्य पदार्थ उत्खननका लागि अहिलेसम्म उक्त घाटको ठेक्का लगाएको छैन । तर जिल्लाका विभिन्न क्षेत्रबाट गएका ट्रयाक्टर चालकले मनलाग्दी बालुवा उत्खनन गर्दै आएको स्थानीयले बताए ।

बालुवा लोड गरेवापत संकलन हुने राजस्व रकम स्थानीय मजदुरले बाँडीचुडी गर्दै आएको स्थानीयले बताए । त्यहाँबाट बालुवा लोड गरे वापत स्थानीयले प्रति ट्रयाक्टर सय रुपैयाँ संकलन गर्दै आएका छन् । 

घाटबाट दैनिक ५० देखि ७० ट्रयाक्टरले बालुवा उत्खनन गरेर ढुवानी गर्दै आएको रकम संकलन गरिरहेका बिरेन्द्र राय यादवले बताए । ‘गाउँलेको सल्लाहमा आफूले ४ दिनदेखि पैसा उठाउन सुरु गरेको छु,’ उनले भने, ‘पहिला अरूले उठाएर खाई हल्थे, म चाहिँ मास्दिन ।’ उठेको रकमलाई कल्भर्ट निर्माणमा खर्च गरिने उनले बताए ।

जिल्ला समन्वय समितिले यहाँको आवश्यकतालाई नबुझ्दा समस्यामा परेको उनले बताए । माओवादी केन्द्रका स्थानीय नेता किशोरी महतोले दुरुपयोग हुँदै गरेको रकमलाई सदुपयोग गर्न प्रयासरत रहेको उनले बताए । ‘अहिलेसम्म माधोपुर घाटको ठेक्का भएको छैन,’ उनले भने, ‘स्थानीय निकायबाट ठेक्का नलाग्दा त्यसलाई खेर जान नदिन उठाउन प्रयास गरेका छौं ।’ यसका लागि स्थानीय प्रशासनबाट समेत अनुमति लिने उनले बताए ।

उत्खनन हुन थालेको नदीजन्य पदार्थबारे स्थानीय तह बेखबर छ । त्यसलाई कानुनी दायरामा ल्याउन कुनै पहल कदमी नगरेको सरोकारवालाले आरोप लगाए । उत्खनन भइरहेको गुनासो आएको र त्यसको अनुगमन गर्न स्थानीय विकास अधिकारीलाई आफूले निर्देशन दिइसकेको प्रमुख जिल्ला अधिकारी उद्धवबहादुर थापाले बताए । ‘सूचना पाउनासाथ अनुगमन गर्न निर्देशन दिएको छु,’ उनले भने, ‘अवैध रूपले नदीजन्य पदार्थ उत्खनन गर्न पाइँदैन ।’ 

प्रकाशित : चैत्र १८, २०७३ १०:१९
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT