माछापालन र कृषितिर लागे ज्याक मा
काठमाडौँ — प्रविधि उद्योग सञ्चालनमा ख्यातीप्राप्त चिनियाँ धनाढ्य ज्याक मा हिजोआज कृषिसम्बन्धी परियोजनाहरूमा संलग्न छन् । ई-कमर्स जायन्ट अलिबाबाका सहसंस्थापक उनी पछिल्ला केही वर्षयता कृषि-प्रविधिसम्बन्धी अध्ययनमा जुटेका छन् । अहिले सेवा निवृत्त जीवन बाँचिरहँदा उनले एग्रो-टेक स्टार्टअपमा लगानी गरेको पाइएको छ ।
हाङझोउ शहरमा सञ्चालित ‘१.८ मिटर्स मरिन टेक्नोलजी (जिजियाङ) को’ नामक नवप्रवर्तन व्यवसायमा ज्याक माको होल्डिङ कम्पनी ‘हाङझोउ दाजिङताउ नं २२ आर्टस एन्ड कल्चर को’ ले ८० प्रतिशत लगानी गरेको द साउथ चाइना मर्निङ पोस्टले जनाएको छ । सन् २०२० मा चीनका राज्य नियन्त्रित बैंकहरूलाई ‘कवाडी पसलेको मानसिकता भएका’ र चिनियाँ अधिकारीहरूले डिजिटल अर्थतन्त्रको व्यवस्थापन गर्न नजानेको जस्ता कडा अभिव्यक्ति दिएपछि उनी रहस्यमय तवरले गायब भएका थिए ।
सरकारको आलोचना गरेर सार्वजनिक जीवनबाट हराउँदादेखि नै उनले कृषि-प्रविधिमा अध्ययन थालेको बताइन्छ । तीन वर्षपछि हाल देखापरेका उनी एग्रो-टेक व्यवसायबारे बुझ्न पनि विभिन्न देश डुलिरहेका छन् । सन् २०२१ मा प्रविधि र कृषिको समायोजनले वातावरणमा पार्नसक्ने प्रभावको अध्ययनका लागि उनी स्पेन गएका थिए । यही विषयमा थप शिक्षित हुने ध्येयले उनी त्यसपछि नेदरल्यान्ड्स, जापान र थाइल्यान्ड गएको समाचार संस्थाहरूले जनाएका छन् । जापानमा उनले माछा र टुना पालनबारे अध्ययन गरेको र थाइल्यान्डमा स्रिम्प फार्मिङबारे बुझेका थिए । पछिल्लो समय उनी नेपाल, पाकिस्तान लगायत दक्षिण एसियाली देशहरूको पनि भ्रमणमा निस्किएका थिए ।
ज्याक माले लगानी गरेको एग्रो-टेक स्टार्टअपले मत्स्यपालन, जलाचरसम्बन्धी उत्पादन, आहार र प्रशोधनलगायत क्षेत्रमा काम गर्छ । कम्पनीको दर्ता पुँजी १ करोड ५० लाख अमेरिकी डलर रहेको बताइन्छ । यही वर्षको मे महिनादेखि टोकियो विश्वविद्यालयमा अध्यापन सुरु गरेका माले त्यहाँ दिगो कृषि र खाद्य उत्पादनबारे अनुसन्धानसमेत गर्ने विश्वविद्यालयले जनाएको छ ।
प्रकाशित : श्रावण १९, २०८० १२:५३