वैशाखमा १ अर्ब ६४ करोड ८३ लाख रुपैयाँ विदेशी लगानी प्रतिबद्धता
काठमाडौँ — चालु आर्थिक वर्षको वैशाखमा मात्रै १ अर्ब ६४ करोड ८३ लाख रुपैयाँ विदेशी लगानी प्रतिबद्धता भएको छ । उद्योग विभागका अनुसार २८ वटा उद्योगमा उक्त विदेशी लगानीको प्रस्ताव स्विकृत भएको हो ।
चैत महिनामा ३३ वटा उद्याेगमा ७ अर्ब ५५ कराेड १८ लाख रुपैयाँ प्रत्यक्ष विदेशी लगानी प्रतिवद्धता प्राप्त भएकाे विभागकाे तथ्यांक छ । चालु आर्थिक वर्षको साउनदेखि वैशाखसम्म २१९ वटा उद्योगमा २९ अर्ब ७४ करोड १ लाख ४३ हजार रुपैयाँ लगानी प्रस्तावित भएको छ । साउनदेखि वैशाख मसान्तसम्म १२ हजार १७१ लाई रोजगारी दिने प्रस्ताव गरेको हो । राष्ट्र बैंकको तथ्यांकअनुसार चालु आर्थिक वर्षको साउनदेखि चैत मसान्तसम्म १ अर्ब ६२ करोड १० लाख रुपैयाँ मात्रै प्रत्यक्ष विदेशी लगानी भित्रिएको छ ।
चालु आर्थिक वर्षको साउनदेखि वैशाखसम्म स्वदेशी र विदेशी उद्याेगमा १ खर्ब ९२ अर्ब रुपैयाँ बराबर लगानी प्रस्ताव आएको छ । साउनदेखि वैशाखसम्म लगानी प्रस्तावित उद्योगमा १८ हजार ५२४ जनालाई रोजगारी दिइने अनुमान छ । विभागका अनुसार वैशाखमा ७ वटा डिजाइन र २५२ वटा ट्रेडमार्क दर्ता भएका छन् । चालु आर्थिक वर्षको साउनदेखि वैशाखसम्म ६ वटा पेटेन्ट, १८ वटा डिजाइन र २ हजार ४२७ वटा ट्रेडमार्क दर्ता भएको विभागको तथ्यांक छ ।
प्रकाशित : जेष्ठ १०, २०८० १६:२६