पीडालुसँग चामल- अर्थ / वाणिज्य - कान्तिपुर समाचार

पीडालुसँग चामल

विमल खतिवडा

कोराक (चितवन) — कोराक ६ स्थित नौलपुरका कामधन चेपाङले यो बर्ष ३ क्विन्टल पिँडालु फलाए । बिक्रिका लागि बजार जानु परेन । गाउँमै चामलसँग पिँडालु साटे । तीन क्विन्टल पिँडालुबाट उनले २ क्विन्टल १० केजी चामल पाए ।

‘पहिला मकै कोदो फलाउँदा खान पुग्दैन थियो,’ उनले भने, ‘अहिले समस्या छैन, पिँडालु लगाउन थालेपछि अनिकाल टरेको छ ।’ पहिला असोजबाट अनिकालले सताउने गर्थ्यो । १० जनाको परिवार पाल्न उनलाई समस्या थियो ।

‘पिँडालु फलाएपछि गाउँमै चामल आइपुग्छ,’ उनले भने, ‘त्यही भएर पिँडालु अहिले अनिकाल टार्ने माध्यम बनेको छ ।’ यसरी व्यावसायिक रूपमा पिँडालु लगाउन थालेको ३ वर्षभन्दा बढी भएको उनले बताए । उनले मात्र पिँडालु लगाएका छैनन् ।

कोराकको ४, ५ र ६ र त्यस्तै सिद्धिको ३, ४ र ५ वडामा लगाइएको पिँडालु एकै ठाउँमा जम्मा गरेर गाउँलेलाई चामल उपलब्ध गराउने गरिएको छ ।

गाउँलेले फलाएको पिँडालु जम्मा गरेर बजारमा लगी बिक्री गर्ने गरिएको पिँडालु संकलनकर्ता अर्जुन चेपाङले बताए । ‘पैसा दिँदा किलोको २५ रुपैयाँ पर्छ,’ उनले भने,‘ पैसा लिनेभन्दा चामल लिने धेरै छन् ।’

उनका अनुसार ५० किलो पिँडालुको ३५ किलो चामल दिने गरिएको छ । पहिला गाउँलेले डोकोमा बोकेर जिल्लाको पर्सा, बीरेन्द्रनगर, खुरखुरे बजार लगेर बिक्री गर्ने गर्थे ।

अहिले गाउँमै मोटरबाटो पुगेपछि काठमाडौं, पोखरा लग्ने गरिएको छ । पुस पहिलो साताबाट यसको बिक्री सुरु गरिन्छ । अहिले गाउँलेलाई चामलसँग पिँडालु साट्न भ्याइनभ्याई छ । माघे संक्रान्तिमा यसको माग बढी हुने भएकाले गाउँलेको पिँडालु जम्मा गरेर माग भएको बजारमा पुर्‍याउने गरिन्छ ।

प्रकाशित : पुस १६, २०७२ ०९:५२
प्रतिक्रिया
पठाउनुहोस्

इंग्ल्यान्डको सानदार जित

एएफपी

डर्बान (दक्षिण अफ्रिका) — मोइन अलीले उत्कृष्ट प्रदर्शन गरेपछि इंग्ल्यान्डले दक्षिण अफ्रिकाविरुद्ध पहिलो टेस्टको अन्तिम दिन बुधबार किङ्समिडमा २ सय ४१ रनको जित हासिल गरेको छ ।

अफस्पिनर अलीले सुरुआतमै तीन विकेट लिएका थिए । दक्षिण अफ्रिकाले पछिल्ला ३८ रनमा ६ विकेट गुमाएको थियो । उसले १३६–४ को स्थितिबाट दिनको खेल सुरु गरेको थियो । उसले दिनको तेस्रो बलमै मुख्य खेलाडी एबी डे भिल्लियर्सलाई गुमाएको थियो । उनी अलीको बलमा बच्ने प्रयास गर्दा एलबीडब्लू धरापमा परेका थिए ।

अर्को ओभरको तेस्रो बलमा अलीले तेम्बा बभुमालाई आउट गरे । बभुमाको क्याच जोनी बइस्र्तोभले लिएका थिए । चौथो दिनको अन्त्यमा स्टेभेन फिनले फाफ डु प्लेसिसलाई आउट गरेका थिए । त्यससहित दक्षिण अफ्रिकाले कुनै रन नजोडदै तीन विकेट गुमाएको थियो । थप दुई रन जोडेपछि फिनले नाइटवाचम्यान डेल स्टेनलाई बोल्ड गरेका थिए ।

डे भिल्लियर्सलाई जस्तै किली एबोटलाई एलबीडब्लूमा पार्दै अलीले तेस्रो विकेट लिएका थिए । लयलाई लिएर दक्षिण अफ्रिकाका लागि चिन्ताको विषय बनेका जेपी डुमिनीले नटआउट २६ रन जोडे । स्टुआर्ट ब्रोडले मोर्न मोर्केललाई एलबीडब्लू आउट गर्दै इंग्ल्यान्डलाई जित दिलाएका थिए ।

सिरिजअघि टेस्ट वरीयताको पाँचौं स्थानमा रहेको इंग्ल्यान्डका लागि यो महत्त्वपूर्ण जित हो । शीर्ष वरीयताका दक्षिण अफ्रिकाको कमजोर ब्याटिङ निरन्तर रह्यो । उसले भारतमा चार खेलको टेस्ट सिरिज ३–० ले गुमाएको थियो ।

 इंग्ल्यान्डले दक्षिण अफ्रिकाको तुलनामा राम्रो ब्याटिङ गर्‍यो । उसका अधिकांश ब्याट्सम्यानको योगदान उपयोगी रह्यो । ब्रोड, फिन र अलीको बलिङ पनि माथिल्लो कोटिको रह्यो । ब्रोडले दक्षिण अफ्रिकाको पहिलो इनिङ्सलाई संकटमा पारेका थिए ।

चौथो दिन फिनले लिएका तीन विकेट निर्णायक थिए । अलीको लामो स्पेललाई एकरूपता दिएर खेलमा १ सय १६ रन दिएर ७ विकेट लिए । फिनले ६ विकेट लिए भने ब्रोडले ५ विकेट हात पारे ।

दोस्रो टेस्ट शनिबार न्युल्यान्डमा सुरु हुनेछ । त्यसैले दक्षिण अफ्रिकालाई ब्याटिङ कमजोरीलाई सुधार गर्ने खास समय छैन । काँधको चोटका कारण डेल स्टेन नहुने भएकोले उसको बलिङ पनि कमजोर हुन सक्छ ।

प्रकाशित : पुस १६, २०७२ ०९:४२
पूरा पढ्नुहोस्
प्रतिक्रिया
पठाउनुहोस्
×